Elordada «Nur Otan» partıasynyń qoldaýymen Walt Disney Pictures stýdıasynyń «Enkanto» anımasıalyq fılminiń premera aldyndaǵy kórsetilimi boldy. Bul – «Bolashaq» qory men «Meloman» kompanıasynyń bastamasy boıynsha eń joǵary standarttar boıynsha qazaq tiline dýblájdalyp otyrǵan 38-shi kınokartına.

«Bolashaq» qorynyń qamqorshylyq keńesiniń qurmetti múshesi Baýyrjan Baıbek atap kórsetkendeı, sheteldik fılmderdi búdjetten tys qarajat esebinen memlekettik tilge dýblájdaý – bolashaqtyqtar iske asyrǵan álemdegi birden bir jeke bastama. 2011 jyldan beri jobaǵa 22 demeýshi kompanıa qoldaý kórsetti, al barlyq 38 fılmdi dýblájdaýdyń jalpy quny 1,5 mlrd teńgeden astam boldy.

«2011 jyly bizdiń «Ózińnen basta» atty jobamyzdy elimizdiń Tuńǵysh Prezıdenti – Elbasy Nursultan Nazarbaev qoldady. Nátıjesinde, 10 jyl ishinde balalar úshin qazaq tilinde 70 saǵattan astam sapaly kontent jasadyq. Táýelsizdiktiń 30 jyldyǵyn atap ótý qarsańynda biz qazaqstandyqtarǵa sońǵy jobamyz – «Enkanto» atty fılmdi yqylaspen tartý etemiz. Osy jyldar aralyǵynda bizge qoldaý kórsetken barlyq akterlerge, rejıserlerge, áriptester men demeýshilerge taǵy da úlken alǵysymdy bildiremin», - dedi Baýyrjan Baıbek.

Onyń aıtýynsha, bolashaqtyqtardyń bastamasy «Nur Otan» partásynyń qoldaýymen jalǵasyn taýyp, memlekettik tilde sapaly mýltımedıalyq kontent jasaý jónindegi ulttyq saıasattyń bir bóligine aınalady.

«Barsha ult ókilderiniń ózindik bolmys-bitimin saqtaı otyryp, qazaq tilin, mádenıet pen dástúrdi damytý «Nur Otan» partıasynyń strategıalyq basymdyǵy bolyp tabylady. Memleket basshysy Qasym-Jomart Toqaev jarıa etken partıanyń Saılaýaldy baǵdarlamasyn júzege asyrý boıynsha Jol kartasy aıasynda «Kınematografıa týraly» Zańǵa ózgerister engizý josparlanǵan. Kınoteatrlarda qazaq tilindegi kontentti kórýge teńdeı múmkindik berý maqsatynda jyl saıyn keminde 15 anımasıalyq fılm men otbasylyq tamashalaýǵa arnalǵan fılmniń dýblájyn qamtamasyz etýge memlekettik qoldaý kórsetý kózdelip otyr, – dedi ol.

«Ýolt Dısneı Kompanı SNG» kompanıasynyń bas dırektory Kahaber Abashıdze «Bolashaq» qoryn 10 jyldyq mereıtoıymen quttyqtaı otyryp, kompanıa úshin qazaqstandyq úkimettik emes uıymmen yntymaqtastyq ornatyp, Qazaqstanda biregeı mádenı jáne áleýmettik jobalarǵa qoldaý kórsetý zor mártebe ekendigin atap ótti.

«Biz osy elde qazaq tiline kásibı dýbláj jasaýdyń qalyptasýyna qatysýshy bolǵanymyzdy maqtan tutamyz. Birlesken jumystyń arqasynda TMD elderi aýmaǵynda alǵashqy bolyp kınokonsert formatyn usynyp, ony TV-ǵa kóshirgenimizge qýanyshtymyz. Sondaı-aq, biz qordyń aýtıstik spektri buzylǵan adamdar úshin qolaıly orta qurý jobasymen balalar men jastardy qoldaý jónindegi áleýmettik jobasy aıasyndaǵy yntymaqtastyqty baǵalaımyz», – dep atap kórsetti óz málimdemesinde Kahaber Abashıdze.

Osy jyldar aralyǵynda bolashaqtyqtardyń jobasy arqasynda qazaq tili «Walt Disney» kompanıasynyń tarıhynda 39-shy jáne ekinshi túrki tili bolǵanyn atap ótken jón. Sondaı-aq, qazaq tili Shyǵys Eýropa men TMD elderi úshin shyǵarylatyn gollıvýdtyq fılmderdiń Blu-Ray-de kórýge bolatyn negizgi 7 tiliniń qataryna qosyldy. Jobanyń arqasynda 100-den astam qazaqstandyq akter búginde «Walt Disney Pictures»-tiń dybystyq bazasynda tur, al shyǵarmashylyq jáne tehnıkalyq mamandyqtar salasynyń 203 ókili «Walt Disney Pictures» stýdıasynyń standarttary boıynsha oqýdan ótti.

Qazaqstan kınoteatrlarynda «Enkanto» 25 qarashada qazaq jáne orys tilderinde shyǵyp, sodan keıin IVI jáne Megogo onlaın-kınoteatrlarynda qazaq tilinde kórýge bolatyn sheteldik fılmder koleksıasyn tolyqtyrady. «Enkanto» – «BI Group» qurylys holdıńiniń demeýshilik qoldaýymen dýblájdalyp otyrǵan 13-shi fılm.