Almaty qalasynda qoǵamdyq kólikpen júrý aqysy qymbattaýy múmkin. Bul týraly brıfıńte qala ákiminiń orynbasary Serik Qusaıynov málimdedi. 

Búginde Almatyda 151 qalalyq baǵyt bar. Onyń teń jartysyna "Almatyelektrotrans" komýnaldyq kólik parki qyzmet kórsetedi. Qalǵan baǵyttar 20 jeke kompanıanyń ıeliginde. Taǵy jekemenshik kishi kompanıalar da bar. 

Qusaıynovtyń aıtýynsha, jańa jyldan keıin jol tarıfi qunynda ózgeris bolýy múmkin. 

– Bizde qoǵamdyq kólikterde eń tómengi tarıf 80 teńge. Joldyń baǵasy budan eki ese qymbat bolýy kerek. Jańa jyldan keıin tarıf qunyn ózgertý jolyn qarastyramyz. Tasymaldaýshy kompanıalar baǵany qazir-aq kóterýge daıyn tur. Biraq bul máseleni biz halyqpen aqyldasamyz. Qazir baǵa qanshalyqty ósetinin aıta almaımyn, –  dedi ol.