Bıyl Shymkentte «Nurly jer» memlekettik baǵdarlamasynyń aıasynda 79 kópqabatty turǵyn úıdiń qurylysy júrgizilip, jyl sońyna deıin onyń 39-yn paıdalanýǵa berý josparlanyp otyr.

Bul týraly "Juldyzdy 30 kún" is-sharalar josparyna sáıkes Shymkent qalasy ákimdiginiń qurylys basqarmasy uıymdastyrǵan baspasóz týry barysynda basqarma basshysy Ábilseıit Rabaev málimdedi.

BAQ ókilderi aldymen Turan shaǵynaýdanyndaǵy qurylysy aıaqtalǵan turǵyn úılermen tanysty. Zamanaýı sáýlettik jobalar boıynsha salynǵan toǵyz jáne on eki qabatty úılerde turǵyndarǵa barlyq jaǵdaı jasalǵan. Jol, sý, elektr qýaty men ózge de ınjenerlik-kommýnıkasıalyq jeliler tartylǵan. Qoǵamdyq kólik júrip tur.

— Bıyl Shymkentte «Nurly jer» baǵdarlamasy boıynsha 79 turǵyn úıdiń qurylysy júrgizildi. Onyń ishinde 2 437 páterli 39 úı bıyl salynyp bitti. Munyń 337 páteri úı kezeginde turǵan azamattarǵa arendalyq baspana retinde úlestiriledi. Qalǵan 2 100 páter kredıttik júıemen beriledi, — deıdi Á.Rabaev.

Aıta keteıik, Turan shaǵynaýdany — qazir Shymkenttegi eń úlken qurylys alańy. Onda 88 kópqabatty turǵyn úı salý josparlanǵan. 2020 jyly 27 úı el ıgiligine berilse, bıyl bul kórsetkish 29-ǵa jetipti. 2022 jyly osy shaǵynaýdanda taǵy 32 kópqabatty turǵyn úıdiń qurylysy aıaqtaldy.

—Shymkentte arendalyq turǵyn úıdiń kezeginde 46 myń otbasy tur. Al, kredıttik baspana alǵysy keletinder 148 myńnan asady. Osyndaı úlken suranysty eskere otyryp, qazir Turan shaǵynaýdanynda salynýy tıis qosymsha 50 kópqabatty turǵyn úıdiń jobalyq-smetalyq qujattaryn ázirlep jatyrmyz. Olardyń qurylysy 2023 jyly bastalady, — dedi Ábilseıit Baıseıituly.

Baspasóz týry barysynda jýrnalıser Shymkenttegi №46 mekteptiń janynan salynyp jatqan qosalqy ǵımarattyń da qurylysymen tanysty. 300 oryndy ǵımarat bıylǵy shilde aıynda salyna bastaǵan. Kelesi oqý jylynyń basynda oqýshylarǵa esigin aıqara ashady dep kútilýde.

Qalalyq qurylys basqarmasynyń basshysy Á.Rabaevtyń aıtýynsha, bıyl Shymkentte búdjet qarjysy esebinen 11 mektep ǵımaratynyń qurylysy júrgizilip, onyń 4-eýi qyrkúıek aıynda paıdalanýǵa berilgen. Qalǵan 7 ǵımarat kelesi jyly salynyp bitedi.

Aıdar QULJANOV.
Foto Serik QOSAEV.