5 jeltoqsan kúni Almatyda Táýelsizdiktiń 30 jyldyǵyna oraı VIII Halyqaralyq matematıka, fızıka jáne ınformatıka muǵalimderiniń forýmy ótti. Jıynǵa Asqar Jumadildaev, Muhtar Ótelbaev, Qaırosh Mákishev sekildi belgili matematıkter jáne májilis depýtaty Irına Smırnova qatysty.

Forýmda sóz alǵan mamandar bilim berý salasyndaǵy pandemıadan keıingi qordalanǵan problemalardy kóterdi. Atap aıtqanda, oqýshylardyń psıhologıasyndaǵy ózgerister, onlaın bilim berýdegi memlekettik tapsyrystyń bólinýi, úshtildilik, bilim berý salasyndaǵy reformalardyń tıimdiligi týraly sóz qozǵady. Sondaı-aq táýelsizdiktiń 30 jyldyǵyndaǵy bilim júıesiniń jetistikteri men kemshilikteri, oqýshylar arasyndaǵy teńsizdikter, Edtex salasyndaǵy ınovasıa taqyryptary talqylandy. Forýmǵa jınalǵan muǵalimder de osy máseleler boıynsha óz oıyn ortaǵa salyp, usynystaryn bólisti. Jıynda kóterilgen máseleler men usynystar júıelenip, «Matematıka pánderi muǵalimderi qaýymdastyǵy» atynan Bilim jáne Ǵylym mınıstrligine joldanatyny aıtyldy.

Uıymdastyrýshylardyń aıtýynsha, forýmdy ótkizýdegi negizgi maqsat - matematıka páni muǵalimderin qoldaý, yntalandyrý jáne tájirıbe almasý, sala ókilderin kásibı alańǵa jınaý, Qazaqstannyń matematıkalyq bilimin álemdegi jetekshi orynǵa shyǵarý. Atalmysh shara aıasynda fızıka, matematıka jáne ınformatıka páni muǵalimderi arasynda pándik baıqaý ótti. Qazaqstan matematıka páni muǵalimderi asosıasıasynyń dırektory Qaırosh Mákishev tapsyrmalardyń kúrdeli ekenin jetkizdi.

- Esep eki bólikten turady. Birinshi bóliginde túrli baǵyttaǵy kúrdeli esepter berildi. Al ekinshi bóligindegi esepter shyǵarmashylyq baǵytynda boldy. Bul esepterdiń shartyna ádeıi ózgertý engizdik jáne oqýshylardyń qate shyǵarǵan esebin usyndyq. Jarys qatysýshylary oqýshynyń qatesin taýyp, túzetý engizýi qajet, - dedi Qaırosh Bekseıituly.

Forým sońynda úzdik muǵalimder anyqtalyp, jeńimpazdar baǵaly syılyqtarmen jáne QR BǴM dıplomymen marapattaldy.