Búgin elordada Qazaqstan Táýelsizdiginiń 30 jyldyǵyna arnalǵan halyqaralyq konferensıa ótti. Onda májilis tóraǵasy Nurlan Nyǵmatýlın sóz sóıledi. Palata spıkeri elbasy Nursultan Ábishuly Nazarbaevtyń 30 jyl ishinde ekonomıkasy myqty, qoǵamy turaqty, halqy tatý, mártebesi bıik, táýelsiz Qazaqstannyń irgetasyn qalaǵanyn, búginde ony odan ári nyǵaıtý úshin memleket basshysy Qasym-Jomart Kemeluly Toqaev tabysty júzege asyryp jatqanyn atap ótti.

Óz sózinde Nurlan Nyǵmatýlın táýelsizdik – kóp elder úshin asqaq arman ekenin, bizdiń babalarymyz ǵasyrlar boıy ańsaǵan osy asqaq armannyń oryndalǵanyna bıyl 30 jyl tolyp otyrǵanyn, bul biz úshin qaıtalanbas tarıh ekenin aıtty.

Májilis tóraǵasy atap ótkendeı, táýelsizdiktiń  alǵashqy jyldary ońaı bolǵan joq. Jetpis jyl boıy bılik júrgizgen Keńes Odaǵy taraǵannan keıin, bizdiń halqymyzdyń jaǵdaıy óte aýyr boldy. Sol kezde barlyq óndiris jáne zaýyt-fabrıkalar toqtap, kolhoz-sovhozdar tarap, mektepter, mádenı ortalyqtar jabyldy. Myńdaǵan azamattar jumyssyz qaldy. Birneshe aı boıy eńbekaqy, stıpendıa basqa da tólemder berilmeı, ekonomıkalyq daǵdarys oryn aldy. Osyndaı aýyr kezeńde táýekel etip, el taǵdyryn qolyna alǵan Elbasymyz kemeńger basshylyǵymen týǵan eldiń senimin erlikpen, abyroımen aqtady.

- Qazaqstannyń 30 jyldyq damý jolynda halqymyzdyń rýhy kóterildi. Elimizdiń eńsesi bıiktedi. Dalamyz da, qalamyz da, ómir sapasy da zaman talabyna saı jańǵyryp, jańa ómirge qadam bastyq. Jańa memleket, jańa ekonomıka, jańa qoǵam qurdyq. Tarıhpen alǵanda az ǵana ýaqyt 30 jyl ishinde damyǵan elderdiń qataryna kirdik, - dedi májilis tóraǵasy.

Nurlan Nyǵmatýlınniń aıtýynsha, búginde táýelsiz Qazaqstan – óziniń myńdaǵan shaqyrym shekarasyn bekitken, dúnıejúzine taraǵan qandastaryn bir shańyraqtyń astyna jınaǵan, kóp ult ókilderin ortaq Otanǵa biriktirgen, búkil álemge qajetti halyqaralyq máselelerge bastamashy bolǵan tanymal, bedeldi memleket. Oǵan dálel Eýropalyq qaýipsizdik jáne yntymaqtastyq  uıymyna tóraǵalyq etkeni, Ortalyq Azıa elderiniń ishinde alǵashqy bolyp BUU Qaýipsizdik Keńesine turaqty emes múshe bolǵany.

Sonymen birge, palata spıkeri búginde Nur-Sultan qalasy  táýelsizdigimizdiń máńgilik irgetasy, Shyǵys pen Batysty baılanystyratyn Eýrazıa órkenıetiniń Altyn Ordasy ekenin, elbasynyń taǵy bir tarıhı sheshiminiń arqasynda ashylǵan jańa Túrkistan oblysy – Eýropa men Azıany qosatyn búkil Túrki áleminiń rýhanı  ortalyǵy dep atanǵanyna nazar aýdardy.

- Bizdiń halqymyz aıtqandaı, «tarıh ótken kúnge emes, tarıh bolashaqqa jol salady». Bizdiń 30 jyldyq tarıhymyz, shyqqan bıikterimiz, zor tabystarymyz – ol aldaǵy uly maqsattarymyzǵa jetý jolyndaǵy abyroıly beles. Biz Elbasynyń táýelsizdik taǵylymyn basshylyqqa ala otyryp, Memleket Basshysy aıtqandaı, shynaıy patrıottyq sezimmen rýhtanyp, qasıetti Táýelsizdigimizdi odan ári nyǵaıtý úshin birlesip, judyryqtaı jumylyp, jumys isteýimiz kerek. Bul elim, jerim deıtin árbir azamattyń paryzy. Biz babalarymyzdyń qasıetti jolymen, Táýelsizdiktiń qudiretti kúshimen, bolashaqtyń asqaq rýhymen áli talaı bıikterdi baǵyndyryp, áli talaı asýlardan asatyn bolamyz, - dedi Nurlan Nyǵmatýlın.

 Májilistiń baspasóz qyzmeti