Atyraý oblysynyń ákimi Mahambet Dosmuhambetov óziniń orynbasary Baqytgúl Hamenovanyń isine qatysty pikirin bildirdi. Bul týraly ákim búgingi úkimet otyrysynan keıin jýrnalıser suraǵyna jaýap bergen.
– Hamenovanyń ornynda ázirge eshkim joq. Onyń qyzmeti ákimniń orynbasarlary arasynda bólingen. Tergeý júrip jatyr, tergeýden keıin bári belgili bolady. Men bul iske túsinikteme bere almaımyn. Qazir tergeý júrip jatyr. 10 jeltoqsanda kináli me, joq pa, sol kezde anyqtalady, – dedi oblys ákimi.
Hamenovanyń ustalýyn qalaı qabyldadyńyz degen suraqqa ákim: "Árıne, qatty qapalandym" dep jaýap berdi.
Ákim orynbasarlarynyń kinási dáleldense otstavkaǵa ketýge daıyn ekenin aıtty.
– Mende ondaı aqparat joq, estigen joqpyn. Bul máseleni retteıtin zań bar. Eger orynbasarlarymnyń sybaılas jemqorlyq jasaǵany anyqtalsa, onda zańǵa sáıkes men otstavkaǵa ketýim kerek. Al ony Memleket basshysy qabyldaıdy, – dedi Dosmuhambetov.
Biraq Mahambet Dosmuhambetov tergeý qorytyndysyn kútýge keńes beredi.
Oblys ákimi Atyraýda Abaı eskertkishin ornatý jumystary keıinge shegerilýi múmkin ekenin atap aıtty.
– Eskertkish týraly sheshim, qatelespesem, 2016 jyly qabyldanǵan. Pandemıa kezinde jumysty júrgize almadyq, eskertkishti bıyl ornatý josparda bar edi. Iá, ýaqyty sozylýy múmkin nemese sozylmaıdy. Tergeý áser ete me, aıta almaımyn, – dep jaýap berdi Mahambet Dosmuhambetov.
Eske sala keteıik, 10 jeltoqsan kúni Atyraý oblysy ákiminiń orynbasary Baqytgúl Hamenova men oblystyq mádenıet basqarmasynyń basshysy Aqylbek Rysqalıev 4,5 mln teńge kóleminde para aldy degen kúdikpen ustalǵan bolatyn.
Keıin Atyraý qalasynyń mamandandyrylǵan tergeý soty ızolátorda otyrǵan oblys ákiminiń orynbasary Baqytgúl Hamenovany úıqamaqqa jiberilgenin málimdegen.
Sot kúdiktiniń eki balany tárbıelep otyrǵan jalǵyzbasty ana ekenin, asyraýynda qart anasy baryn, Atyraýda turǵylyqty mekenjaıy baryn, qylmystyq qýdalaý organdarynan jasyrynbaǵanyn jáne buryn sottalmaǵanyn eskergen.
Pikir qaldyrý