Atyraý oblysynyń ákimdigi Baqytgúl Hamenovanyń qylmystyq isinde kórinis tapqan Abaı Qunanbaev eskertkishine qatysty suraqqa jaýap berdi. Bul týraly azh.kz basylymy habarlady.

Basylym taratqan aqparatqa súıensek, eskertkishti ornatý bastamasy tarıh jáne mádenıet eskertkishterin qorǵaý jónindegi oblystyq komısıadan kelip túsken, keıin bul usynys 2018 jyly 14 mamyrda Mádenıet jáne sport mınıstrligine joldanǵan.

"2018 jyldyń 17 shildesinde ony mınıstrlik janyndaǵy monýmentaldy ónerdiń jańa qurylystaryn ornatý jónindegi komısıa maquldaıdy. 2019 jyldyń 22 sáýirinde ashyq konkýrs jarıalanyp, sol jyldyń 20 qarashasynda komısıa músinshi Asqar Nartovtyń jobasyn tańdap, eki jyldan keıin qalalyq mádenıet bólimi "Balqytý" JSHS-men 145 mln teńgege shart jasasqan. Bıyl 72 mln 499 myń teńge bólinip, ol qarajat tolyq ıgerilgen. Qalǵany 2022 jyldyń búdjetinen bólinedi" delingen ákimdik taratqan habarlamada. 

Kórkem qoladan jasalǵan eskertkishtiń bıiktigi – 11 metr (onyń tuǵyry– 5,75 metr), salmaǵy – 5 tonna.

Aıta keteıik, Baqytgúl Hamenova ustalǵannan keıin eskertkishtiń saltanatty ashylýy 27 jeltoqsanǵa aýystyrylǵan bolatyn.

Eske sala keteıik, Atyraý oblysy ákiminiń orynbasary Baqytgúl Hamenova men oblystyq mádenıet basqarmasynyń basshysy Aqylbek Rysqalıev Abaı eskertkishin ornatýǵa memlekettik satyp alý shartyn jasaǵany úshin 4,5 mıllıon teńge kóleminde para aldy degen kúdikke ilingen bolatyn.

Oqı otyryńyz: Sot Baqytgúl Hamenovany úıqamaqqa jiberilý sebebin túsindirdi