Almatyda «Meıirim mekeni» úıi ashyldy. Bul – qaladaǵy kópbalaly analar men áleýmettik jaǵdaıy tómen otbasylarǵa kómek kórsetý maqsatynda iske asqan joba. Sonyń nátıjesinde 50 otbasy 5 jyl boıyna tegin páterde turýǵa múmkindik aldy. Ondaǵy komýnaldyq shyǵyn men jaldamaly páter aqysyn kásipkerler óz moıyndaryna alǵan. Osylaısha, áleýmettik sanattaǵy januıalarǵa jaǵdaıyn turaqtap, bolashaqta óz baspanalaryna aqsha jınaýǵa múmkindik týyp otyr, dep habarlady Azattyq rýhy basylymy.

Baspanaly bolǵandar qatarynda Meıramgúl Palmanova da bar. Buǵan deıin páterden páterge kóship, kóringenniń bosaǵasyn jaǵalap júrgen kópbalaly otbasy jańa úıge qonystandy. Otaǵasy birneshe jyl buryn dúnıeden ótken. Ózi jaldamaly jumys isteıdi. Alǵan aılyǵy shaılyǵynan aspaıtyn áıel úshin qaıyrymdy jandar syılaǵan baspana eń úlken qýanysh.

«Óte qýanyshtymyn. Osy jobaǵa shaqyryp, bizge úı bergen Márıash degen kisige sheksiz rızamyn. Qansha armandasaq ta, bul armanyma jetemin dep eńbektenip, úı ala almaı júrgenbiz. Munda tegin turamyz. Sol aralyqta biraz aqsha jınap, óz úıimizdi alamyz. Balalarym úshin qýanyshtymyn. Bárinen buryn 4 balam kóńildenip qaldy. Endi sabaqtaryn jyly, jaryq ári jaıly jerde oqıdy», – deıdi kópbalaly ana.

Barlyǵy 50 otbasyǵa arnalǵan eki qabatty úıdiń qurylysy 3 jyl júrgen.

Áleýmettik joba tolyqtaı kásipkerlerdiń qoldaýymen júzege asqan. Olar tek úı salyp berýmen ǵana shektelmeı, aldaǵy ýaqytta azyq-túlik pen kıim-keshek turǵysynan da kómektesetinin aıtady.

«Ákem úısiz-kúısiz júrgen jandardy buryn úıimizge ákelip baǵatyn, bireýlerden sondaı otbasylar eken dese, solardy úıge ákelip, kómektesetin. Meniń ákem – soǵys ardageri. Biz de muqtaj jandarǵa kómek berýdi jón kórdik. Ol bizge burynnan qanymyzǵa sińgen qasıet, ata-babalarymyz árdaıym jurtqa qamqor bolǵan eken», – dedi osy joba júzege asyrǵan Márıash Serikbaıqyzy.

Kásipkerlerdiń aıtýynsha, bul úı tolyqtaı turǵyndar menshigine ótkizilmeıdi. Aldaǵy 5 jylǵa kelisimshartqa otyryp, joba áleýmettik qoldaý maqsatynda júzege asady. Bastapqy kezde komýnaldyq tólemder, kerek bolsa, azyq-túlikterine de kómek beriledi. Munda keletinder aldyn ala arnaıy komısıanyń súzgisinen ótip, jaǵdaıy óte tómen otbasylarǵa ǵana beriledi. Búgin arnaıy komısıa qaraýynan ótken 6 otbasyǵa páter kilti tabystaldy. Eki bólmeden turatyn, barlyq jıhazdarmen jabdyqtalǵan jáne jýyný bólmesi bar páterlerge jaqyn arada ózge turǵyndar da shetinen qonystanady, deıdi kásipkerliktiń áleýmettik jaýapkershiligi úshin qolǵa alynǵan joba jetekshileri.