Almatynyń bas sanıtar dárigeri Jandarbek Bekshın "Omıkron" shtamy Qazaqstanǵa keletininen qashyp qutylý múmkin emestigin aıtty. Bul týraly ol óńirlik komýnıkasıalar qyzmetinde ótken baspasóz konferensıasynda jetkizdi.
Qalanyń bas sanıtary almatylyqtardy adamdar kóp jınalatyn oryndarǵa, banketterge barmaýǵa, merekeni otbasynda atap ótýge shaqyrdy.
– Jańa jyldyq merekeler koronavırýstyń taralýyna sebep bolmaýy kerek, – deıdi ol.
Bekshın megapolıste ujymdyq ımýnıtettiń deńgeıi 58,4 paıyzdy quraıtynyn aıtyp, adamdar vaksına saldyrmaıynsha, megapolıste mýtasıalanǵan shtammdardyń paıda bolý qaýpi artatynyn atap ótti.
Onyń boljaýynsha, Almatyda "Omıkron" shtamynyń kezekti tolqyny bastalýy yqtımal.
Bekshın Dúnıejúzilik densaýlyq saqtaý uıymynyń derekterin negizge ala otyryryp, epıdemıaǵa qarsy sharalar men turǵyndardy revaksınasıalaýdy jedeldetý qajet ekenin aıtty.
Onyń sózinshe, qazirgi ýaqytta Almaty qalasyndaǵy KVI boıynsha epıdemıologıalyq jaǵdaı turaqty.
– Táýligine 30-35 adam koronavırýs ınfeksıasymen tirkelip jatyr. Biraq bul – bosańsýǵa sebep emes. "Omıkron" koronavırýstyń jańa shtammy. Infeksıa búkil álemde tez taralýda jáne qazirdiń ózinde álemniń 106 elinde, tipti ujymdyq ımýnıtettiń joǵary deńgeıi tirkelgen jerde de anyqtalǵan. Bul ınfeksıa vaksınasıanyń tolyq kýrsyn ótýdi qajet etedi, – dedi Bekshın.
Bas sanıtar dáriger shetelden keletinderge qatysty aldyn alý sharalary kúsheıtilgenin atap ótti. Onyń sózinshe, Almatyǵa 3-20 jeltoqsan aralyǵynda 50 myńǵa jýyq jolaýshy kelgen. Onyń ishinde PTR anyqtamalary bary – 29,7 myń, vaksınasıa pasporty bar – 20 myń. Onyń ishinde "omıkron" shtammy tirkelgen elderden 2300 jolaýshy kelgen.
– Kelgen barlyq azamattar bir aptalyq oqshaýlanýǵa jáne medısınalyq baqylaýǵa jiberildi. Olardyń ishinde KVI-men aýyratyn 5 naýqas anyqtaldy. Olar ınfeksıalyq stasıonarǵa oqshaýlandy. Jolaýshylardyń shamamen 90 paıyzy Germanıa, Egıpet jáne Ulybrıtanıadan keldi, – dedi ol.
Buǵan deıin Densaýlyq saqtaý mınıstrligi qańtar aıynda koronavırýsqa baılanysty pesımısik senarıı ornaýy múmkin ekenin eskertken. Oǵan saı qańtarda kúnine 3 myńdaı adam indet juqtyrýy yqtımal.
Pikir qaldyrý