Zeınetkerlik jasqa jetken jáne zeınetaqy jınaqtary bar adamdar belgilengen keste boıynsha BJZQ-dan tólemder alýǵa quqyly. Bul týraly BJZQ baspasóz qyzmeti habarlady.

"Zeınet jasyna tolýyna baılanysty BJZQ-dan zeınetaqy tólemderin taǵaıyndaý úshin alýshylar turǵylyqty jeri boıynsha "Azamattarǵa arnalǵan úkimet" memlekettik korporasıasynyń (HQKO) bólimshelerine ýaqtyly júginýleri qajet. Zeınetaqy tólemderi ótinish berilgen kúnnen bastap taǵaıyndalady jáne zeınetaqy jınaqtary taýsylǵansha júzege asyrylady" delingen habarlamada.

Merzimsiz bolyp belgilengen birinshi jáne ekinshi toptaǵy múgedektigi bar salymshylarǵa BJZQ-dan zeınetaqy tólemderin taǵaıyndaý úshin alýshylar BJZQ-nyń óńirlik bólimshelerine, nemese elektrondyq sıfrlyq qoltańbasy bolǵan jaǵdaıda BJZQ-nyń ınternet-saıty arqyly (www.enpf.kz) ótinish qaldyrýy qajet.

"Zeınetaqy taǵaıyndaý týraly ótinishpen birge HQKO-ǵa qujattardy zeınet jasyna jetýge 10 kún qalǵanda berýge bolady. Osyǵan baılanysty aǵymdaǵy jyly 60 jasqa tolǵan, týǵan kúni 31 jeltoqsanǵa (qosa alǵanda) deıingi áıelderden 2021 jyldyń sońyna deıin HQKO-ǵa júginýin suraımyz, óıtkeni 2022 jyldyń 1 qańtarynan bastap áıelder úshin zeınetke shyǵý jasy 60,5 jasqa deıin ulǵaıady" delingen taratqan aqparatta.

BJZQ mindetti zeınetaqy jarnalary jáne mindetti kásiptik zeınetaqy jarnalary esebinen qalyptastyrylǵan BJZQ-da zeınetaqy jınaqtary bar jáne jalpyǵa birdeı belgilengen zeınet jasyna tolǵan adamdardyń (erler 63 jasqa tolǵanda, áıelder 2021 jyly 60 jasqa tolǵanda, áıelderdiń zeınetkerlik jasyn jyl saıyn 2027 jyly 63 jasqa tolǵanǵa deıin jarty jylǵa ulǵaıta otyryp), sondaı-aq múgedektigi merzimsiz bolyp belgilengen birinshi jáne ekinshi toptaǵy múgedektigi bar adamdardyń, bekitilgen keste boıynsha BJZQ-dan zeınetaqy tólemderin alýǵa quqyǵy bar ekenin eske salady.