Qysqy konkýrs qorytyndysy boıynsha magıstratýraǵa bilim granttary ıegerleriniń tizimi jarıalandy. Memlekettik granttardy 945 qazaqstandyq jeńip aldy. Onyń ishinde ǵylymı-pedagogıkalyq magıstratýraǵa 837 adam, beıindik magıstratýraǵa 108 adam oqýǵa tústi. Bul týraly bilim jáne ǵylym mınıstrliginiń baspasóz qyzmeti málim etti.

Mınıstrlik málimetinshe, úmitkerlerdiń arasynda "Injenerlik, óńdeý jáne qurylys salalary", "Jaratylystaný ǵylymdary, matematıka jáne statısıka", "Áleýmettik ǵylymdar, jýrnalısıka jáne aqparat" syndy baǵyttar suranysqa ıe boldy.

Bıyl mınıstrlik magıstratýra men doktorantýraǵa granttar berý úshin konkýrsty eki ret dástúrli túrde jazda jáne alǵash ret qosymsha qysta uıymdastyrdy. Osylaısha, túrli sebepterge baılanysty magıstratýraǵa túse almaǵan úmitkerler bilim berý granttaryn taǵaıyndaý konkýrsyna qatysýǵa ekinshi múmkindik aldy.

Barlyq grant ıegerleri 10 qańtarǵa deıin qujattaryn ýnıversıtetterdiń vırtýaldy qabyldaý komısıalary arqyly tapsyrýy tıis. Oqý joǵary oqý oryndarynyń akademıalyq kúntizbesine sáıkes bastalady.

Mınıstrlik irikteý sapasyn jaqsartý úshin aqyly bólimge magıstratýraǵa túsý úshin shekti bal kóterilgenin, atap ótti. Memlekettik bilim berý tapsyrysy boıynsha jáne aqyly negizde ǵylymı-pedagogıkalyq magıstratýraǵa túsý úshin shekti bal – 75, beıindi magıstratýraǵa túsý úshin 50 baldy quraıdy.

Grant ıegerleriniń tolyq tizimin myna jerden kórýge bolady