Shyǵys Qazaqstan oblysy Rıdder qalalyq turǵyn úı komýnaldyq sharýashylyǵy bóliminiń burynǵy basshysy Qýat Muhamedchınov 4 jylǵa bas bostandyǵynan aıyryldy. Onymen istes bolǵan eki azamatqa da úkim shyqty, dep habarlady 24.kz telearnasy.
Belgili bolǵandaı, Qýat Muhamedchınov Shyǵys Qazaqstan oblysy ákiminiń orynbasary Azamat Muhamedchınovtyń týǵan baýyry.
Eks-sheneýnikke "elektr jelisi qurylys nysanyn salý kezinde" memleketke 146 mıllıon teńgege jýyq shyǵyn keltirdi degen aıyp taǵylǵan.
Telearna málimetinshe, eks-sheneýnik merdiger kásiporynnyń istemegen jumys aktisine qol qoıyp, qabyldaǵan. Saldarynan qyrýar qarjy merdigerge ótip ketken. Aktide kórsetilgen qurylys materıaldary shyn máninde joq bolyp shyqqan.
Qýat Muhamedchınovmen birge onyń eki sybaılasy "Eńbek-Óskemen" respýblıkalyq memlekettik kásiporynynyń jetekshisi Asqat Qudaıbergenov pen "Elızor-M" JSHS-niń dırektory Alekseı Behtold ta qylmystyq jaýapkershilikke tartyldy. Aldyńǵysy qylmystyq top jumysyna bolysty dep aıyptalyp, 4 jylǵa bas bostandyǵynan aıyrylsa, sońǵysy osyndaı aıyppen 3 jylǵa sottalǵan.
Aıyptalýshylar buǵan deıin Rıdderde ótken alǵashqy sotta aqtalyp shyqqan. Alaıda prokýratýra shaǵymy boıynsha is oblystyq sotta qaıta qaralyp, kúdiktiler kináli dep tanylǵan.
– Olar endigi orta qaýipsizdiktegi túzetý mekemelerinde jazasyn ótep jatyr. Elektr jelisi salynbady, al qarjy talan tarajǵa túsip ketken. Alǵashqy sotta dálelder tıisti deńgeıde eskerilmedi. Degenmen oblystyq sot onyń barlyǵyn túzep, barlyq dálel-dáıekti aıqyndady. Sottalýshylar endi joǵarǵy sotqa shaǵymdana alady, – dedi oblystyq sot sýdıasy.
Daýly elektr jelisiniń qurylysy 2017 jyly bastalǵan. Joba boıynsha elektr jelisi Rıdderden Batys Altaı qoryǵyna deıin tartylýy kerek bolǵan. Alaıda joba aıaqsyz qalyp otyr.
Pikir qaldyrý