​​Qazaqstannyń Syrtqy ister mınıstrligi jekelegen sheteldik BAQ-tardaǵy jarıalanymdarǵa qatysty pikir bildirdi. 

Mınıstrliktiń habarlaýynsha, elde tótenshe jaǵdaı engizilgennen beri qalyptasqan ahýalǵa baılanysty sheteldik BAQ-taǵy birqatar jarıalanymdar atústi jáne birjaqty sıpatta bolǵan.

Osyǵan baılanysty Syrtqy ister mınıstrligi kelesini atap ótti.

• Mańǵystaý oblysy men eldiń barlyq iri qalalarynda beıbit mıtıńter ótti. Olardyń talaptary tolyq qanaǵattandyrylǵan. Alaıda, terrorshyl, ekstremıstik jáne qylmystyq toptar shıelenis pen zorlyq-zombylyqty ýshyqtyrý úshin bul jaǵdaıdy óz múddesine paıdalanyp alǵan. Osyǵan baılanysty elde tótenshe jaǵdaı jarıalandy.
• Almaty qalasyndaǵy jáne eldiń basqa da óńirlerindegi oqıǵalar kórsetkendeı, Qazaqstan shetelde daıyndyqtan ótken jáne jaqsy úılestirilgen terrorshyl toptardyń shabýylyna tap boldy. Aldyn ala málimetke qaraǵanda, shabýylshylardyń arasynda janjal aımaqtarynda dinı radıkaldyq toptardyń qatarynda qaqtyǵystarǵa qatysý tájirıbesine ıe adamdar bar.
• Qazirgi ýaqytta Qazaqstannyń quqyq qorǵaý organdary men Qarýly kúshteri, keıbir sheteldik BAQ burmalap kórsetkendeı, "beıbit sıpattaǵy narazy toptarǵa" emes, terrorısterge qarsy turýda.
• Qalyptasqan jaǵdaıda, Qazaqstan Ujymdyq qaýipsizdik týraly shart uıymyna (UQSHU) kómekke júginýge májbúr bolǵan, ol jaǵdaıdy turaqtandyrý maqsatynda jalpy sany 2 500 adam quraıtyn bitimgershilik kúshin jibergen. Bitimgershilerdiń mandatyna strategıalyq nysandardy kúzetý jáne qazaqstandyq quqyq qorǵaý kúshterine járdemdesý kiredi.

Terrorshyl toptarǵa qarsy negizgi is-qımyldy Qazaqstannyń quqyq qorǵaý organdary men Qarýly kúshteri júrgizetinine nazar aýdaramyz.

UQSHU-dyń bitimgershilik kúshteri Qazaqstanda ýaqytsha negizde bolatynyn jáne jaǵdaı turaqtalǵan soń Qazaqstan tarapynyń birinshi suraýy túsken kezde óz elderine oralatynyn atap ótti.

Quqyq qorǵaý organdaryna qalyptasqan jaǵdaıdyń sebepterine keshendi tergeý júrgizý tapsyryldy, onyń nátıjeleri halyqaralyq qoǵamdastyqqa jetkiziletin bolady.

Qaqtyǵystardyń saldarynan elimizdiń azamattary, sonyń ishinde quqyq qorǵaý organdarynyń qyzmetkerleri men áskerıler qaza tapty.

Osyǵan baılanysty, 2022 j. 10 qańtar elimizde jalpyulttyq aza tutý kúni bolyp jarıalandy.