9 qańtarda "Qazaqstan" jáne "Habar 24" arnalary "Qazaqstandaǵy mıtıńige qatysqany úshin aqsha aldy" dep Qyrǵyzstan azamaty delingen adamdy kórsetken edi. Artynsha oqıǵa barysy múlde basqa arnaǵa aýdy.

Vıkram Rýzahýnov esimdi Qyrǵyzstan azamaty resmı telearnalardan kórsetilgen vıdeoda 1 qańtarda beıtanys adamdar telefon arqyly habarlasyp, mıtıńige qatysý úshin 90 myń teńge usynǵanyn, bılet ápergenin, páterge ornalastyrǵanyn aıtady.

Kóp uzamaı qyrǵyzstandyq basylymdar Vıkram Rýzahýnov Qyrǵyzstanǵa belgili jaz mýzykanty ekenin, Qazaqstanǵa konsertke kelgenin jarysa jazdy. 

Mýzykanttyń týystary onymen baılanysa almaǵandyqtan, Qyrǵyzstannyń quzyretti organdaryna júgingen. Al Qyrǵyzstannyń Syrtqy ister mınıstrligi oqıǵaǵa baılanysty tekseris júrgizip, Rýzahýnovqa polısıa zábir kórsetkenin málimdep, Qazaqstanǵa qarsylyq notasyn jarıalady.

Qyrǵyzstan Syrtqy ister mınıstriniń orynbasary Nuran Nıazalıev Rýzahýnovty múmkindiginshe tezirek bosatýdy talap etip, Qazaqstandy sheteldikterdiń oqıǵalarǵa qatysy týraly senimdi aqparat jarıalaýǵa shaqyrdy.

Buǵan deıin Qyrǵyzstannyń ulttyq qaýipsizdik komıtetiniń tóraǵasy Kamchıbek Tahıev múddeli taraptar qyrǵyz azamattary týraly teris aqparatpen qyrǵyzdar men qazaqtar arasyndaǵy qarym-qatynasty shıelenistirýge tyrysyp jatqanyn, jaqsy daıyndalǵan aqparattyq shabýyl ekenin málimdegen.

10 aqpan kúni «Vechernıı Bıshkek» aqparattyq saıtynyń málimetinshe, Almatydaǵy tártipsizdikke qatysty dep ustalǵan Qyrǵyzstan azamaty Vıkram Rýzahýnovty qarýly kúshter bosatqan. Qyrǵyzstandyq jýrnalıs Kamılla Valıeva Qamshy aqparattyq saıtyna Rýzahýnov bosatylǵannan keıin Bishkekke jolǵa shyǵyp, eline aman-esen barǵany týraly habarlady.

Qazaqstanda bılikke qarsy jappaı narazylyq sońy tártipsizdikke ulasqan soń bılik eldegi jaǵdaıǵa "shetelde daıyndalǵan terrorısterdi" aıyptaı bastaǵan. Biraq bılik "terrorısterdiń" kim ekenin naqty aıtpaı otyr.