El dúrbeleńge túsip, eleń-alań alasapyran bolyp ketkeni úreı týǵyzyp, eldiń endigi taǵdyry ne bolmaq dep oılanyp qaldyq. Biraq Prezıdent Qasym-Jomart Toqaev osy sátte óziniń myqty basshy, bilikti saıasatker ekenin kórsete bildi. Ol óz halqyna demeý bolyp, tyǵyryqtan shyǵýda batyl sheshimder qabyldaı bilýi bizdiń erteńge degen senimimizdi oıatyp, eńsemizdi kóterdi.

Prezıdent Qasym-Jomart Toqaev búgingi Májilistiń keńeıtilgen otyrysynda Úkimet basshysyn taǵaıyndap, aldaǵy ýaqyttaǵy iske asatyn naqty jumystardy atap kórsetti. Onyń ishinde halyqtyń kóńilinen shyqqan aıryqsha josparlar bar.

Atap aıtqanda, Ujymdyq qaýipsizdik týraly shart uıymy (UQSHU) taıaý kúnderi elimizden shyǵatyny. Bul uıym 1992 jylǵy 15 mamyrda qol qoıylǵan Ujymdyq qaýipsizdik týraly shart negizinde qurylǵan halyqaralyq qaýipsizdik salasyndaǵy halyqaralyq óńirlik uıym ekeni belgili. UQSHU músheleri - Armenıa, Belarýs, Qazaqstan, Qyrǵyzstan, Reseı, Tájikstan. Sharttyń kúshi bes jyl saıyn uzartylady.

Uıymnyń negizgi maqsaty - beıbitshilik, halyqaralyq jáne óńirlik qaýipsizdik pen turaqtylyqty nyǵaıtý, múshe memleketterdiń táýelsizdigin, aýmaqtyq tutastyǵy men egemendigin ujymdyq negizde qorǵaý, múshe memleketteri saıası quraldarǵa qol jetkizýde basymdyǵyn beredi.

Sondyqtan bul uıymnyń áskerlerin elimizge ákelgeni týraly túrli qaýesetke erýdiń qajeti joq dep sanaımyz. Bul elimizdiń egemendigine zıan kelmeıtin sheshim boldy. Olar eldegi jaǵdaıǵa baılanysty qorǵaý maqsatynda Prezıdent aldyrǵanyn túsindik jáne elimizde bolyp jatqan lańkestikke qatyspaı, memleketimiz úshin mańyzdy strategıalyq nysandardyń qaýipsizdigin qamtamasyz etýde. Jaǵdaı turaqtalǵan soń elderine jiberilmek.

Árıne, Aqtaýdan bastalǵan oqıǵa barysy ókimet aldyna áleýmettik talappen shyǵyp, gazdyń baǵasyn 50 teńgege túsirdi, halyqtyń áleýmettik jaǵdaıynyń tómendigin ókimet túsindi. Bul aımaqta qarý qoldanylǵan joq, buzaqy toptarǵa jol bergen joq. Ókinishke oraı, osy sherýdi lańkestik toptar elimizdiń megapolısi Almatyda paıdalanyp, kóp zıan keltirildi.

Áleýmettik jaǵdaıǵa qatysty halyqtyń qory – «Qazaqstan halqyna» qurylatyn boldy. Osy qorǵa qarjy quıatyn iri kompanıalardyń tizimi jasalyp, oǵan quıatyn qarjy jyl saıynǵy mólsheri qalaı bolatynyn Prezıdent esepteýdi tapsyrdy. Bul úlken betburys, óıtkeni qazaq halqynyń jaǵdaıy nashar ekenine bárimiz kýámiz. Sondyqtan bul qordan elimizdegi áleýmettik jaǵdaıy tómen halyqqa kómek kórsetiletini qýanarlyq qadam boldy. Árıne, densaýlyq máselesi de, jumyspen qamtý máselesi de osy qor boıynsha qamtylady dep oılaımyz. «Qazaqstan halqyna» qory halyq úshin qurylatyndyqtan ony adal, kásibı bilikti azamat basqaratyny aıtyldy.

Halyqtyń kedeılenýin toqtatý máselesi de aıtyldy. Endi qaltaly olıgarhtardyń qaltasy qaǵylatyny týraly máseleni kóteretini aıtldy. Bul da quptarlyq is dep oılaımyz. Baı, aýqatty adamdar qoǵamǵa kerek, alaıda bizde shetel baılaryndaı tarıhta qalyp, áli kúnge deıin kele jatqan áýletti baılar bar ma?! Ǵylymǵa áli kúnge deıin syılyq berip, yntalandyryp jatqan álemdik deńgeıdegi Nobel sıaqty tulǵalar nege joq dep eriksiz oılanasyń.

Prezıdentimiz jańa Qazaqstandy quryp, tolyqqandy reformalardy júrgizip, halyqtyń jaǵdaıyn jaqsartýdy qolǵa alǵany úlken bastama dep sanaımyz. Endi osy máseleler boıynsha tapsyrma alǵan tıisti uıymdar ádil, durys júzege asyrsa dep kútemiz.

El birligine syzat túspeı, halqynyń amandyǵy úshin qandaı da bir batyl sheshim qabyldaı biletin Memleket basshysyn – Prezıdetimiz Q.-J. Toqaevty biz árkez qoldaımyz. Onyń jasampaz bastamalary men eldiń kóńilinen shyǵatyn sheshimderi bizge rýh berip, qanattandyrady.

Begalıeva A.Q.

Ál-Farabı   atyndaǵy    QazUÝ JOO-ǵa deıingi daıyndyq

kafedrasynyń aǵa oqytýshysy.