Almatyda jappaı tártipsizdikterge qatysýshylarǵa qarý taratqan úsh kúdikti ustaldy. Bul týraly qalalyq polısıa departamenti bastyǵynyń orynbasary Berik Ábilbekov málimdedi.

Ustalǵandar 19 ben 20 jas aralyǵyndaǵy jigitter. Aıtýynsha, olardy belgisiz bireýler qarý-jaraq dúkenine shabýyl jasap, qarý taratýǵa májbúrlegen.

– Olar qaladaǵy bazarlardyń biriniń aýmaǵynda ustaldy. Qazirgi ýaqytta aıyptalýshylar qamaýda otyr. Olardyń basqa da qylmystarǵa qatysy bar-joǵyn mindetti túrde tekseremiz, – dedi departament bastyǵynyń orynbasary.

Polısıa málimetinshe, kúdiktiler oqıǵanyń qalaı bolǵanyn jáne qarý-jaraqtardy belgili bir top májbúrli túrde taratýǵa buıryq bergenin aıtqan. 

– Biz qarý-jaraq dúkenine shabýyl jasadyq. Bizdi osylaı jasaýǵa májbúrlegen bir top adam boldy. Sosyn biz urlaǵan qarý-jaraqtyń jartysyn ózderine alyp aldy, avtomattaryn silkip turdy. Men aq tústi Lexus kóligin júrgizdim, – degen birinshi kúdikti polısıa jaralaǵan vıdeoda.

Al, ekinshi kúdikti mundaı áreketke qoryqqandarynan barǵandaryn aıtqan.

– Bular – gaztumyldyryq kıgen, avtomat, pyshaqpen qarýlanǵan adamdar. Olar bizge qarýdy tez alyp shyǵyp, ony aparyp berýdi buıyrdy. Biz ony qoryqqannan istedik, bul adamdar bizge qysym kórsetti. Avtomat asynǵan adamdardan qalaı qoryqpaısyń, – deıdi ekinshi kúdikti.

Áleýmettik jelide Almatyda dúrbeleń kezinde belgisiz adamdar qarý-jaraq dúkeninen qarý alyp shyǵyp, Respýblıka alańyna jınalǵandarǵa taratyp jatqan vıdeo taraǵan.