Qazaqstan men Ózbekstan eki eldiń birqatar óńirinde jaryq sónýin bir-birinen kórip jatyr.

Qazaqstandyq "KEGOC" kompanıasy elektr energıasynyń toqtaýyna Ózbekstan, Qyrǵyzstandaǵy energıa júıesinde týyndaǵan apattyq jaǵdaı sebep ekenin málim etken.

"2022 jyldyń 25 qańtarynda saǵat 11.59-da (Nur-Sultan ýaqytymen) Ortalyq Azıa (Ózbekstan, Qyrǵyzstan) energıa júıesinde týyndaǵan aıtarlyqtaı apattyq teńgerimsizdiktiń saldarynan "Soltústik-SHyǵys-Qazaqstannyń ońtústigi" 500 kV elektr energıasy tranzıtine arnalǵan qýattyń tómendeýi oryn aldy. Sonyń saldarynan "Soltústik-SHyǵys-Qazaqstannyń ońtústigi" tranzıtiniń apatty bólinýi oryn alyp, Qazaqstannyń ońtústik aımaǵyndaǵy tutynýshylardyń basym bóligi úshin jaryq óshti. Shektelý kólemi shamamen 1 500 megavatty quraıdy. Qazirgi ýaqytta júıe operatory «KEGOC» AQ apatty joıý is-sharalaryn qabyldap jatyr" delingen kompanıa aqparatynda.

Al Ózbekstan energetıka mınıstrligi taratqan aqparatta apattyq jaǵdaı Qazaqstanda týyndaǵany aıtylady.

"Qazaqstan Respýblıkasy elektr jelisindegi iri apat saldarynan Almaty, Shymkent qalalarynda, Túrkistan oblysynda elektr energıasyn tasymaldaýda kidirister týdy" delingen aqparattyq habarlamada.