Ákimdikter jer berýdi jáne berilgen jerdiń paıdalanylýyn baqylaý jónindegi fýnksıalarynan aıyryldy. Bul týraly aýyl sharýashylyǵy mınıstrligi habarlady.

Mınıstrlik málimetinshe, 2014 jyldan bastap jerdiń paıdalanylýy men qorǵalýyn memlekettik baqylaý fýnksıalary tolyǵymen jergilikti atqarýshy organdarǵa júktelgen.

"Buryn Jer qatynastary jáne Memlekettik baqylaý basqarmalary oblystyq, qalalyq jáne aýdandyq ákimdikterdiń quramyna kirip, onda "múddeler qaqtyǵysy" oryn alatyn. Sondaı-aq jer qatynastary jáne jerdiń paıdalanylýy men qorǵalýyn baqylaý jónindegi ýákiletti organdardyń bir memlekettik organda bolýyna baılanysty sybaılas jemqorlyq sıpatyndaǵy sheshimder qabyldaý táýekeli bolatyn. Memleket basshysynyń 2021 jylǵy 19 naýryzdaǵy QR Prezıdenti janyndaǵy Ulttyq qoǵamdyq senim keńesiniń V otyrysynda bergen tapsyrmasyna sáıkes, jer reformasy jónindegi komısıa quryldy.  Komısıanyń 5 otyrysynda 120-dan astam usynys kóterilip, jer zańnamasyn jetildirý boıynsha birqatar júıeli usynymdar ázirlendi. Usynystardyń biri “ortalyq-óńir” qaǵıdaty boıynsha jerdi utymdy paıdalanýǵa memlekettik baqylaýdyń biryńǵaı vertıkalyn qurý boldy" delingen aqparattyq habarlamada.

Osyǵan baılanysty, 2021 jylǵy 30 maýsymda "Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańy qabyldanǵan. Ol jerdiń paıdalanylýy men qorǵalýyn memlekettik baqylaý fýnksıalaryn 2022 jylǵy 1 qańtardan bastap aýmaqtyq bólimshelerin qura otyryp, ortalyq ýákiletti organnyń vedomstvosyna berýdi kózdeıdi.