AQSH prezıdenti Djo Baıden Reseı Ýkraınaǵa basyp kiretin bolsa, Vladımır Pýtınge jeke sanksıalar qarastyratynyn málimdedi. Ol sonymen qatar, shıelenisti "ekinshi dúnıejúzilik soǵystan keıingi eń iri shabýyl bolýy múmkin" dep sıpattady.

Jýrnalıserdiń suraqtaryna jaýap bere otyryp, Baıden "Reseı (Ýkraınaǵa) basyp kirse, Pýtınge jeke sanksıalar sala alasyz ba?" degen suraqqa "ıá" dep jaýap berdi.

Baıden Ýkraına shekarasyndaǵy áskerı qozǵalys "búkil álem boıynsha orasan zor zardaptar kútip turǵanyn" bildiretinin aıtty. AQSH prezıdenti "bul – ekinshi dúnıejúzilik soǵystan keıingi eń iri shabýyl" bolýy múmkin ekenin málimdedi.

Ulybrıtanıa, Germanıa, Fransıa sıaqty ózge batys elderi de Máskeýdiń Ýkraınaǵa agresıasynyń aýyr saldary bolatynyn qaıtalaı eskertti.

Al, Reseı Ýkraınaǵa kirýdi josparlap otyrǵanyn joqqa shyǵaryp, batys elderin osy máselege baılanysty "shıelenisti kúsheıtti" dep aıyptady.

Alaıda Máskeý Ýkraınamen shekara mańyna 100 myńǵa jýyq sarbazyn ornalastyrǵan.

Baıden jýrnalıserge bergen jaýabynda "NATO-nyń Shyǵys Eýropadaǵy yqpalyn kúsheıtý kerek" dep oılaıtynyn jetkizdi.

– Biz kez kelgen NATO múshesiniń "NATO bizdi qorǵaýǵa kele me?" dep alańdaýyna negiz joq ekenin túsindirýimiz kerek, – dedi ol.

Biraq ol Ýkraınaǵa AQSH áskerin jiberý jospary joq ekenin qaıtalady.

Reseı bul sózderge aıyptaı jaýap berip, AQSH pen NATO-ny "Ýkraınaǵa zor mólsherdegi qarý-jaraq jáne batystyq keńesshilerdi jiberdi" dep synady.