Prezıdent Qasym-Jomart Toqaev "Nur Otan" partıasynyń kezekten tys XXI sezinde aldaǵy ózgerister týraly aıtyp, eks-prezıdenttiń eńbegin atap ótti.

– Qoǵamdyq qundylyqtar júıesine, saıası jáne áleýmettik-ekonomıkalyq salalarǵa túbegeıli ózgeris engizý qajet. Osy rette, azamattyq qoǵam ınstıtýttaryna zor mindet júkteledi. Ásirese, saıası partıalar aıryqsha ról atqarady. Qazir el ishinde túrli jaǵymsyz áńgimeler tarap jatqanyn bilemin. Osyǵan baılanysty memleket basshysy retinde taǵy da qaıtalap aıtamyn. Tuńǵysh prezıdentimiz elimizdi irgesi berik memleketke aınaldyrý úshin zor eńbek sińirdi. Biz buǵan deıingi jetistikterimizden aıyrylyp qalmaýymyz kerek. Memleketimizdi nyǵaıtyp, kez-kelgen synaqqa daıyn bolýymyz qajet. Tabysqa jetý úshin, eń aldymen, aýyzbirshilik kerek ekenin este ustaıyq, – dedi ol partıa sezinde.

Q.Toqaev N.Nazarbaevtyń tarıhı eńbegin umytpaýǵa shaqyryp "ótken zamandy joqqa shyǵaratyn, óz basshylaryna shabýyl jasaıtyn halyqtyń bolashaǵy ekitalaı ári bulyńǵyr" dedi.

Sondaı-aq ol prezıdent pen kez kelgen partıa jáne qozǵalys arasyndaǵy dıstansıa bolýy kerektigin atap ótip, belgili bir ýaqyttan keıin Nur Otan-daǵy tóraǵalyǵynyń mán-mańyzy qaıta qaralatynyn jetkizdi.

Sonymen qatar Toqaev aldaǵy reformalardy sapaly túrde zańnamalyq turǵyda qamtamasyz etý úshin partıanyń májilistegi fraksıasyn jańǵyrtý kerektigine nazar aýdardy.

– Fraksıa músheleri formalızmnen alys bolyp, qatyp qalǵan qalyptan shyǵýy kerek. Qoǵam ókilderimen kóbirek baılanys ornatýy qajet, – dedi prezıdent.

♦ Toqaev "Nur Otan"-nyń májilistegi fraksıasy jańǵyrtylatynyn aıtty