"Nur Otan" partıasy tóraǵasynyń birinshi orynbasary Baýyrjan Baıbek qyzmetinen ketti. Bul týraly ol áleýmettik jelidegi paraqshasynda málimdedi.

– "Nur Otan" aldyna jańa kózqarastar men tásilderdi talap etetin múlde jańa mindetter qoıyldy. Sondyqtan men partıa tóraǵasy Qasym-Jomart Kemeluly Toqaevqa atqaryp otyrǵan qyzmetimnen bosatý týraly tıisti ótinish berdim. Búgin meniń ótinishim qanaǵattandyryldy, – dedi ol.

B. Baıbek memlekettik jáne partıalyq qyzmette 20 jyldan astam eńbek etken. Eki ret, jalpy alǵanda 6 jylǵa jýyq "Nur Otan" tóraǵasynyń birinshi orynbasary, 3 jylǵa jýyq – prezıdent ákimshiligi basshysynyń orynbasary laýazymdarynda, 4 jyl Almaty qalasynyń ákimi bolyp jumys istegen.

28 qańtarda "Nur Otan" partıasynyń kezekten tys XXI sezinde "Nur Otan" partıasynyń tóraǵalyǵy eks-prezıdent Nursultan Nazarbaevtan Qasym-Jomart Toqaevqa ótken.