Prezıdenti Qasym-Jomart Toqaev úkimettiń keńeıtilgen otyrysynda elde AES salý qajettigi týraly aıtty.
– Biz elektrmen jabdyqtaý júıesiniń jumysynda turaqty irkilisterge tap boldyq. Eń jarqyn mysal – jaqynda eldiń ońtústiginde elektr qýatyn óshirýmen baılanysty boldy. Biz shekaralas memleketterdiń energıa júıesindegi jumystyń sapasyna ishinara táýeldimiz. Jaýapty adamdardyń atom stansıasynyń qurylysy týraly suraqtarǵa jaýap berýden nelikten qashqaqtaıtynyn túsinbeımin. Týrasyn aıtý kerek: taza atom energıasynsyz biz ınvestısıalar týraly aıtpaǵanda, búkil ekonomıkamyzdy joǵaltyp alamyz, óńirlik kóshbasshylyǵymyzdy joǵaltamyz. Bizge elektr energıasy qajet, atomdyq, taza elektr energıasy kerek. Atom energetıkasynyń mańyzdylyǵyn kásibı túrde túsindirý qajet, – dedi prezıdent.
Qazaqstanda birneshe jyldan beri atom elektr stansıasyn salý ıdeıasy kóterilip keledi. Energetıkter AES qajettiligin energetıkalyq tapshylyqpen túsindiredi. Prezıdent Q.Toqaev bıylǵy joldaýynda 2030 jyldarǵa qaraı Qazaqstanda elektr energıasynyń tapshylyǵy bolatynyn aıtqan.
Alaıda qoǵamda AES salýǵa qarsy kóńil-kúı basym. Arys qalasy, Jambyl oblysyndaǵy áskerı qoımalarda bolǵan jarylystan keıin AES salý ıdeıasyna degen teris kózqaras arta túsken. Azamattar arasynda eki jylda eki birdeı joıqyn jarylysqa jol berip qoıǵan úkimettiń áreketine kúmánmen qaraıtyndar basym. "AES salyp, sońy úlken qaıǵyly jaǵdaıǵa uryndyryp júrmesine kim kepil" degen mazmundaǵy pikirler jıi aıtylady.
Pikir qaldyrý