Qańtardaǵy oqıǵadan keıin ustalyp, Qyrǵyzstan bıliginiń aralasýynan soń bosatylǵan qyrǵyzstandyq mýzykant Vıkram Rýzahýnov qamaýda otyrǵanda azaptalǵanyn moıyndap, ózin ekrannan kórsetken jergilikti telearnalarǵa alǵysyn bildirdi. Sózinshe, telearnalar kórsetkenniń arqasynda ony otandastary tanyp, qamaýdan bosaýyna múmkindik týǵan.

– Meni ýaıymdap, bostandyqqa shyǵýyma yqpal etkenderdiń barlyǵyna shyn júrekten alǵys aıtamyn. Qazaqstannyń telearnalaryna rahmet. Eger de bul suhbat bolmaǵanda eshkim meniń qaıda ekenimdi jáne maǵan ne bolǵanyn bilmeıtin edi. Sizderdiń arqalaryńyzda búkil álemdegi parasatty adamdar bolyp jatqan oqıǵalarǵa shynaıy qarap, Qazaqstandaǵy oqıǵalarǵa baısaldy baǵa bere aldy. Men jýrnalıserge Qyrǵyzstanda meniń jumysym bar ekenin aıtqanda eshkim senbedi jáne olar meni tyńdamady. Negizsiz ustalǵan, kinásiz júzdegen adamnyń ishinen meni tańdap, kameraǵa túsirgen adamǵa rahmet. Dárigerler men sál bolmaǵanda ólip ketýim múmkin edi dep otyr. Óıtkeni synǵan qabyrǵalar sol jaq ókpeme zaqym keltirgen, taǵy birneshe soqqy bolsa, júrekke zaqym túser edi, – deıdi Rýzahýnov áleýmettik jelidegi paraqshasynda.

Vıkram Rýzahýnov soqqyǵa jyǵylǵan ýaqytta týystary, dostary, shoý-bıznestegi áriptesteri jáne ony vıdeodan tanyǵan adamdardyń barlyǵy ony qoldaǵanyn jáne bolǵan jaǵdaıdy belsendi túrde jelide jarıalap otyrǵanyn atap ótti.

– Qazaqstannyń quzyrly organdary meniń tulǵamdy tekserip kórmedi. Jaýap alý kezinde men belgili mýzykant ekenimdi qaıta-qaıta qaıtaladym, al azaptaý kezinde aıqaılap men týraly ǵalamtordan qaraýlaryn suradym. Jaýap retinde olar meni ura túsip, mazaq etti, – dep jazdy ol.

Eske sala keteıik, 9 qańtarda "Qazaqstan" jáne "Habar 24" arnalary "Qazaqstandaǵy mıtıńke qatysqany úshin aqsha aldy" dep qyrǵyzstandyq azamatty kórsetken edi. Vıdeoda beti-aýzy kógergen azamat 1 qańtarda beıtanys adamdar telefon arqyly habarlasyp, mıtıńige qatysý úshin 90 myń teńge usynǵanyn, bılet ápergenin, páterge ornalastyrǵanyn aıtady. 

Kóp uzamaı qyrǵyzstandyq basylymdar Vıkram Rýzahýnov Qyrǵyzstanda belgili jaz mýzykanty ekenin, Qazaqstanǵa konsertke kelgenin jarysa jazdy. 

Qyrǵyzstannyń Syrtqy ister mınıstrligi oqıǵaǵa baılanysty tekseris júrgizip, Rýzahýnovqa polısıa zábir kórsetkenin málimdep, Qazaqstanǵa qarsylyq notasyn jarıalady.

10 aqpan kúni Vıkram Rýzahýnov qyrǵyz bıligi aralasqan soń bosatylǵan.