Reseı Syrtqy barlaý qyzmetiniń dırektory Sergeı Naryshkın "Moskovskıı Komsomoles" basylymyna bergen suhbat barysynda barlaý qyzmetinde Qazaqstandaǵy qańtar oqıǵasyna daıyndyq týraly derekter bolǵanyn, olardy Qazaqstandaǵy arnaıy qyzmetke bóliskenin málim etti.
– Eń aldymen Sırıada talqandalǵan ILIM (Irak jáne Levant Islam memleketi) uıymy men ózge de terorıstik toptardyń tonaýshylary Orta Azıa elderine qaraı jyljyp kele jatqany týraly aqparat boldy. Bul bizdiń de, ana elderdiń (Orta Azıa elderi - red) de arnaıy qyzmeti úshin qupıa derek emes edi. Mundaı qozǵalys kimniń qamqorlyǵynyń arqasynda júzege asqany da belgili bolǵan. Aımaqtaǵy barlyq memleketter jaǵdaıǵa baılanysty alańdaýshylyq bildirdi. Biz qolymyzdaǵy aqparatty Qazaqstandaǵy áriptesterimizge, UKSHU-ǵa (ujymdyq qaýipsizdik shart uıymy) kiretin ózge elderge de bólistik, – deıdi Sergeı Naryshkın.
Reseı Syrtqy barlaý qyzmetiniń dırektory Qazaqstandaǵy jaǵdaı destrýktıvtik saıası kúshter beıbit narazylyq aksıalaryn "túrli-tústi refolúsıaǵa operatıvti ári josparly túrde paıdalana alatynyn aıqyn kórsetkenin aıtady.
6 qańtarda prezıdent Qasym-Jomart Toqaev eldegi jappaı tártipsizdikke "terrorlyq shabýyl" degen baǵa berip, buzaqylyqty "naǵyz terrorıster" jasap otyrǵanyn aıtqan. Sondaı-aq ol terorıstik toptar shyn máninde, "shetelde úlken daıyndyqtan ótken halyqaralyq terrorıster ekenin" jáne "olardyń Qazaqstanǵa jasaǵan shabýylyn basqynshylyq akti retinde qarastyrý qajet ekenin" málim etken.
Alaıda resmı oryndar eshqandaı uıymdy, onyń ókilderin atamady. Tek 26 qańtarda "Habar" telearnasy qańtar oqıǵasy týraly kórsetken derekti fılmde oqıǵaǵa "Iakyn Inkar" radıkaldyq aǵym ókilderiniń qatysy bary aıtylǵan. Odan ózge aqparat berilmedi.
Pikir qaldyrý