Qańtar oqıǵasynan keıin 17 kún boıy qamaýda bolǵan Saıat Ádilbekovtan azaptaý faktisi boıynsha jaýap alyndy. Bul týraly Ádilbekov áleýmettik jelidegi paraqshasynda málim etti.

– Aýrýhanada tutqyndaý kezinde jáne SI-18-de meni azaptaýǵa baılanysty túsirgen aryzym boıynsha 10 aqpanda meni antıkorǵa shaqyrdy. 11 aqpanda alǵash ret jaýap aldy. Menen jaýap alǵan antıkordyń aǵa tergeýshisi Aıbek Mýstafın is óte mańyzdy ekenin aıtty. Men muny estip qýandym. SI-18 mekemesinde meni jáne ózgelerdi azaptaǵandar shynymen de tergelip, kináliler sottalady dep úmittenemin. Qazir kóbi úreılenip qalǵan, aryzdanýǵa qorqady. Biraq bizge jasaǵandaryn aıtpaı qalýǵa bolmaıtynyn túsinedi dep senemin, – dedi ol.

Sózinshe, tergeýshimen áńgime 5 saǵatqa jýyq ýaqytqa sozylǵan.

– Shynymdy aıtsam, SIZO-daǵy nárseni búge-shúgesine deıin qaıtadan ótkerý qıynǵa soqty. Quddy meni azaptaǵanyn dálildeýge tıis sıaqtymyn. Sózderimniń rastyǵyn aýrýhana men tergeý ızolátoryndaǵy 8 qańtardan bergi vıdeolardy suratyp-aq bilýge bolady. Qalaı bolǵanda da men buǵan shydaýǵa ázirmin, men úshin bastysy ádildikke qol jetkizý, – deıdi Saıat.

Saıat Ádilbekov 5 qańtarda úıinen syrqattanyp jatqan qyzyna dári alýǵa shyqqan. Jaqyn jerdegi dárihanalardan qajetti dárini tappaı, ortalyqqa barady. Sol jaqta eki jerinen oq tıip jaralanyp, qalalyq 7 aýrýhanaǵa jetkiziledi. Oǵan ota jasalyp, eki kúnin jansaqtaý bóliminde ótkizgen. Al 8 qańtarda ony jáne aýrýhanada jatqan 30-ǵa jýyq jigitti polısıa alyp ketken. Saıat polıseıler aýrýhanada tutqyndaý kezinde, artynsha tergeý ızolátorynda azaptaǵanyn aıtady. Ol 25 qańtar kúni 11 adammen birge bultartpaý sharasy ózgertilip tergeý ızolátorynan bosatylǵan. Alaıda "Jappaı tártipsizdik" baby boıynsha kúdikke ilingen 11 adamnyń isi boıynsha tergeý jalǵasyp jatyr.