Qańtar oqıǵasy qurbandaryn eske alý mıtıńine qatysqany úshin beıbit jıyn ótkizý tártibin buzdy degen aıyppen 15 táýlikke qamalǵan saıası belsendi, Demokratıalyq partıa qurý boıynsha yntaly top jetekshisi Janbolat Mamaı ákimshilik jaza merzimi aıaqtalar shaqta taǵy 48 saǵatqa qamaýǵa alyndy.
Belsendiniń áıeli jýrnalıs Inga Imanbaıdyń aıtýynsha, dúısenbi, 14 naýryz kúni Janbolat Mamaıdy 2 aıǵa qamaýǵa alý boıynsha sanksıalyq sot bolady. Janbolat Mamaı ústinen "Polısıany qorlady, jalǵan málimet taratty" degen aıyptar boıynsha qylmystyq is qozǵalǵanyn málim etken. Bul týraly ol abaqtydan advokaty arqyly joldaǵan hatta jetkizgen.
"Qadirli aǵaıyn! Meni saıası sebeptermen, saıası qýdalaýdyń nátıjesinde qamaýǵa aldy. Polısıany qorlady, jalǵan málimet taratty dep. Eshqandaı qylmys jasaǵan joqpyn. Óz kinámdi moıyndamaımyn. Bizdiń jolymyz aq, adal. Qoldaý kórsetken barsha aǵaıynǵa alǵys aıtamyn. Halyqaralyq uıymdar qoldaý kórsetýi kerek dep sanaımyn. Birge jeńemiz!" deıdi saıası belsendi 12 naýryz kúngi hatynda.
Opozısıalyq jýrnalıs Ermurat Bapı Janbolat Mamaıdyń ústinen qylmystyq is qozǵalýynyń saıası astary bar dep sanaıdy. Sózinshe, munyń artynda Demokratıalyq partıa degen ataýmen saıası partıa qurǵysy kelip júrgen belsendiniń áreketin toqtatý oıy tur.
"Janbolatqa qatysty ákimshilik jazanyń sońyn qylmystyq iske almastyrýdyń amalynan eki boljam jasaýǵa bolady:
Birinshiden, bıylǵy jaz-kúz maýsymynda merziminen buryn parlamenttik saılaý ótýi múmkin;
qylmystyq jaýapkershilikke tartylǵan (eki aılyq tergeýden keıin, sot Mamaıǵa ary ketkende bostandyǵyn shekteý nemese shartty jaza beredi) azamat retinde Janbolat saılaýdan shettetiledi (qazirgi qoldanystaǵy saılaýǵa qatysty zańdylyqtarynyń talaby boıynsha);
Ekinshiden, prezıdent Toqaevtyń naýryz joldaýynan keıin, saılaý jáne saıası partıalar týraly zańdarǵa azdaǵan ózgerister engiziletin bolsa, bılikpen mámilelesýge kónbeıtin opozısıalyq saıasatker Janbolattyń Dempartıasyn saılaýǵa deıin "qaǵyp tastap", tirkeýden ótkizbeýdiń áreketi jasalýda" deıdi jýrnalıs.
Janbolat Mamaıdyń jaqtastary 14 naýryz kúni Almaty qalasy polısıa departamenti ǵımaratynda jınalyp, belsendiniń bostandyǵyn talap etpek.
Pikir qaldyrý