Qoǵam belsendisi, jýrnalıs Sáýle Ábildahanqyzy áıelder partıasyn quratynyn málim etti.
"Aqjúnis" áıelder partıasyn quramyn!!! Barlyq qazaq áıelderi, birigińder!.. Kim jańa partıa zańgeri bolǵysy keledi, óz-ózińizge, biliktiligińizge senimdi bolsańyz, habarlasyńyz! 2-3 jyl buryn qoǵamdyq birlestigimdi tirkeıtin mekenjaı tappaı, qyryq týys, júz dosqa jalynyp, "zıanyń tıedi, bılik meniń sońyma túsip alady, qorqamyn" dep, eshkim óz úıine tirkegisi kelmeı, aqyrynda qolymdy bir siltep qoıǵan edim. Áıelder partıasyn propıskaǵa qoıatyn adam tabyla ma eken?..." deıdi jýrnalıs.
Sáýle Ábildahanqyzy Ábedınova 1972 jylǵy 29 qańtarda dúnıege kelgen. Temirbek Júrgenov atyndaǵy Qazaq Ulttyq Óner akademıasynyń teatr jáne kıno fakúltetin "teatrtanýshy, óner mekemeleriniń menedjeri" mamandyǵy boıynsha bitirgen. "Ónertaný magıstri" magıstrlik dárejesi bar.
Eńbek jolyn "Qazaq ádebıeti" gazetinde mádenıet bóliminiń meńgerýshisi bolyp bastaǵan. El arasyna "Qazaqstan" Ulttyq arnasynyń "Aqjúnis" baǵdarlamasynyń avtory ári júrgizýshisi retinde keńinen tanyldy. Keıingi jyldary "Aqjúnis-Astana" jýrnalyn shyǵarǵan.
Keıingi jyldary qoǵamdyq belsendilikpen aınalysyp júr. Qoǵamdyq belsendi esebinde Saıragúl Saıytbaı isine, kópbalaly analar isine aralasty.
Qańtar oqıǵasynan keıin birneshe azamat partıa qurý týraly nıetin jarıalaǵan. Saıasattanýshy Sanjar Boqaev "Namys", "Baıtaq Bolashaq" ekologıalyq alánsy qoǵamdyq birlestiginiń prezıdenti Azamathan Ámirtaı Oljas Súleımenov, Toqtar Áýbákirovpen birge ekologıalyq "Baıtaq" partıasyn, belgili bıznesmen Bolat Ábilov partıa quratynyn málim etken.
Sondaı-aq saıası alańda 2019 jyly opozısıalyq belsendi Janbolat Mamaı jetekshilik etetin "Demokratıalyq partıa" paıda boldy. Belsendiniń partıany tirkemek bolǵan 2020 jylǵy áreketi sátsiz aıaqtalǵan. Polısıa "Dempartıa" jaqtastaryn shetinen tutqyndaǵannan keıin, belsendiler quryltaıdyń ornyna mıtıń ótkizgen.
2019 jyly belsendi Toǵjan Qojalıeva HAQ (Halyqqa adal qyzmet), bıznes-trener Ahmetjan Nursıla "Sen" atty partıa quratynyn málim etken. Odan beri Toǵjan Qojalıeva keı-keıde belsendilik tanytyp júr. Alaıda túpki oıynda ma, joq ázirge belgisiz. Al Ahmetjan Nursılanyń bul baǵyttaǵy belsendiligi baıqalmaıdy.
Búgin prezıdent Q.Toqaev partıalardy tirkeý prosedýrasy jeńildeıtinin, tirkeý tabaldyryǵy 4 esege 20 myń adamnan, 5 myń adamǵa deıin tómendetiletinin aıtty. Sondaı-aq aımaqtyq ókildikterdiń sany 600-den 200 adamǵa, bastamashyl top ókilderi 700 adamǵa deıin tómendetiletinin jetkizdi.
Prezıdent joldaýynan keıin qoǵam belsendisi Muhtar Taıjan "JER QORǴANY" degen ataýmen partıa quratynyn jarıalady.
