Adal partıasynyń Saıası keńesi Amanat partıasyna qosylý týraly biraýyzdan sheshim qabyldaǵanyn málim etti.
Partıa málimdemesinde búgingideı aýmaly-tókpeli kezeń jyldam beıimdelýdi qajet etetini aıtylyp, "syrtqy saıasattaǵy qaýip-qaterdiń kezinde, keı máselelerge qatysty pikir qaıshylyǵyn qoıyp, "bir jaǵadan bas, bir jeńnen qol shyǵaryp", birge qadam jasaıtyn kezeń týdy" delingen.
"Adal partıasynyń búgingi kúnge deıingi tyń ıdeıalary men zamanaýı tehnologıalyq kózqarastary Prezıdentimizge salmaqty qoldaý bola alady dep esepteımiz. Kez kelgen ózgeriste sabyrly qalpymen salmaqty sheshim qabyldaıtyn Qasym-Jomart Toqaevtyń jumys stıli bizge unaıdy. Ol qazir ádiletti memleket qurýdy kózdep otyr. Memleket basshysynyń búgingi Qazaqstan halqyna Joldaýy aıasynda aıtqan saıası reformalary sonyń taǵy bir dáleli. Biraq bul aıtylǵan reformalar qalaı júzege asyrylady? Másele osynda. Ol úshin búkil qazaq qoǵamy birigýi qajet. Prezıdent reformalarynyń jergilikte jerde tıisti deńgeıde iske asyrylmaı qalý qaýipi joǵary. Qasym-Jomart Kemeluly aıtqan «Dostarǵa – bárin, qalǵanyna zań boıynsha» degen qaǵıdamen kelgen qoǵamnyń ótkenin umytpaýymyz kerek. Sol úshin, biz, adaldyqtar Jańa Qazaqstandy qurýǵa belsendi qatysyp, elimizdegi oń ózgeriske úles qosqymyz keledi. Partıalastarymyzben aqyldasa kele, búgin Adal-dyń Saıası keńesinde prezıdenttik Amanat partıasyna qosylý týraly biraýyzdan sheshim qabyldadyq" deıdi adaldyqtar.
"Adal" 2020 jylǵy qarashada ataýy ózgergen burynǵy "Birlik" partıasy. 2013 jyly tirkelgen. Eldegi resmı tirkelgen 6 partıanyń biri. Partıa músheleri "Rebrendıng" sebebin "ádildikti talap etýshiler kóbeıdi" dep túsindirgen. Partıa sońǵy parlament saılaýy qarsańynda qataryna jýrnalıs Maqsat Tolyqbaı, bloger, qarjy salasynyń mamany Dáýlet Muqaev sıaqty esimi belgili jańa adamdar qosyp, úgit-nasıhat jumystaryn belsendi júrgizgen. Alaıda saılaýda 7 paıyz daýys jınaı almaı, parlamentke óte almaǵan. Saılaýdan keıin partıa belsendiligin báseńdetip, sońǵy ýaqytta múlde kórinbeı ketken.
Pikir qaldyrý