Sońǵy ýaqytta hh.ru vakansıalar saıtynda Reseı azamattary rezúmeleriniń sany arta túsken. Qazirgi tańda İT mamandardyń belsendiligi joǵary, dep jazady HeadHunter kompanıasynyń Qazaqstandaǵy ókildigi.
Jumys izdegen İT mamandardyń basym kópshiligi Grýzıa, Armenıa, Túrkıa sekildi elderge basymdyq berip jatyr.
Hh.ru sarapshylary Reseı eńbek naryǵynda onsyz da kadr tapshylyǵy qatty seziletinin aıtyp otyr. Tapshylyq koronavırýstyń saldary, mıgranttardyń ketýi men eldiń tabıǵı ósiminiń tómendeýi sıaqty sebeptermen baılanysty. Qysqasy reseılik kompanıalarǵa adam jetpeıdi. Eldegi qıyn jaǵdaıdan kadrǵa degen suranys tómendep, dızbalans ornyna keledi degen paıym bar.
Mamandar Qazaqstannyń eńbek naryǵyna Reseıge sanksıa salynýynyń saldary áli sezile qoımady deıdi. Vakansıalar jarıalanatyn hh.kz saıtynda reseılik jumys izdeýshilerdiń oqys belsendiligi baıqalmaǵan. Sarapshylar jumyspen qamtý salasynda reaksıa birden bilinbeıtindikten, analız jasaý úshin belgili bir ýaqyt ótýi kerektigin aıtady. Eńbek naryǵyndaǵy shynaıy kartına jazdyń basyna qaraı belgili bola túspek.
Búǵan deıin Reseı Ýkraınaǵa basyp kirgeli myńdaǵan reseılik otanynan ketip qalǵany habarlanǵan. Reseılikterdiń elinen ketýine qorqynysh, senimsizdik, soǵys bastaǵan memleketpen ózin baılanystyrǵysy kelmeý, bastalyp jatqan ekonomıkalyq daǵdarys sebep.
Reseılikter arasyndaǵy eń tanymal baǵyt Grýzıa bolyp tur. Grýzıa ishki ister mınıstrliginiń málimetinshe, 24 aqpannan beri elge 20 myń reseılik barǵan. Onyń úsh myńǵa jýyǵy áli sol jaqta. Odan keıingi tanymal baǵyttar qatarynda Armenıa men Túrkıa bar. Budan bólek reseılikter Ázerbaıjan, BAÁ, Qazaqstan, Qyrǵyzstan, Ortalyq jáne Ońtústik Amerıkanyń vızasyz elderine ketip jatyr.
Vızasy barlar úshinshi elder arqyly Ulybrıtanıaǵa, AQSH pen Eýroodaq elderine kbarýǵa tyrysýda. Poıyzben Fınlándıaǵa, avtobýspen Latvıaǵa qonys aýdaryp jatqandar az emes.
Mundaı ekspansıa barǵan elderdegi turǵynúı arendasy baǵasynyń kúrt qymbattaýyna ákelip soqqan. Keı jerlerde kelýshilerdi salqyn qarsy alǵan jaǵdaılar da kezdesken. Máselen, Grýzıa astanasy Tbılısıdegi páter arendasy habarlandyrýlarynyń keıbirinde reseılikter men belarýstikterge páter jalǵa berilmeıtini jazylǵan.
Telegram messendjerinde Reseıden ketýshilerdiń ondaǵan chaty ashylǵan. Olardaǵy adam sany 3 myńnan bastalyp, 40 myńǵa deıin jýyqtaıdy. Ol jerde barǵysy keletin elge baılanysty suraqtar qoıylyp, adamdar bir-birine keńes berip jatady.
Pikir qaldyrý