Qazaqstandaǵy sıfrlandyrýdy platformalyq úlgige kóshirýdi otandyq İT-mamandar júzege asyrýy múmkin. Bul týraly Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın prezıdenttiń qabyldaýy boıynsha jazǵan jazbasynda málim etti.
Mýsın prezıdentke mınıstrliktiń byltyrǵy atqarǵan jumystarynyń qorytyndysy, prezıdent tapsyrmalarynyń júzege asyrylýy, sıfrlandyrý jáne IT salasynyń damý perspektıvasy jóninde esep bergenin atap ótti.
Onyń aıtýynsha, byltyr eń qajetti 18 qujat sıfrlyq nusqaǵa aýystyrylǵan. 2021 jyly 628 eldi-mekende ınternet sapasy jaqsartylsa, bıyl taǵy da 140 aýylda osyndaı jumystar júrgizilmek.
– Mobıldi operatorlarmen birge Nur-Sultan, Almaty, Shymkent qalalarynda 5G tehnologıasyn synaqtan sátti ótkizdik. 2022 jyly respýblıkalyq mańyzy bar qalalarda, 2023-2024 jyldary oblys ortalyqtarynda komersıalyq maqsatta iske qosý josparlanyp otyr, – dedi ol.
Mınıstr sóz sońynda prezıdentke sıfrlandyrýdyń platformalyq úlgisine ótýde tájirıbesi bar sarapshylardy tarta otyryp, Govtech platformasyn Ulttyq aqparattyq tehnologıalar AQ jáne qazaqstandyq İT-mamandardyń kúshimen qurýdy usynǵanyn málim etti.
Byltyr Qazaqstan úkimeti eldegi sıfrlandyrýdyń platformalyq modelin reseılik SBER kompanıasyna jasatý boıynsha memorandýmǵa qol qoıǵan. Úkimettik bul sheshimi qoǵamda narazylyq týdyryp, sıfrlandyrýdy sheteldik kompanıaǵa jasatý aqparattyq qaýipsizdikke, aqparattyq egemendikke qater tóndiretini týraly pikirler aıtylǵan. Endi mine, mınıstr platformany qurýdy otandyq mamandarǵa tapsyrý týraly aıtyp otyr.
Pikir qaldyrý