Avstrıa kansleri Karl Nehammer Ýkraınadaǵy soǵys bastalǵaly beri Reseı prezıdenti Vladımır Pýtınmen kezdesken birinshi Eýroodaq basshysy boldy. VVS Nehammer Pýtınniń Máskeýdegi rezıdensıasynda ótken kelissózderdi "tik, ashyq jáne qatal formatta ótti" dep sıpattaǵanyn habarlady.
Tabıǵı gazdyń 80 paıyzyn Reseıden alatyn beıtarap Avstrıa, ádette, Eýropalyq odaqtyń ózge múshelerine qaraǵanda Máskeýmen tyǵyz baılanysta.
"Men Pýtınge soǵys aıaqtalýy kerek degen eń mańyzdy messedjdi jetkizgim keldi. Óıtkeni soǵysta jeńgender bolmaıdy" deıdi Avstrıa kansleri málimdemesinde.
Onyń aıtýynsha, Máskeýge jasaǵan sapar dostyq sapar bolmaǵan.
Nehammer ókili kezdesý 75 mınýtqa sozylǵanyn, bul – Pýtınniń standarttary boıynsha salystyrmaly túrde qysqa ekenin aıtty.
Nehammer qaqtyǵysty toqtatý nemese gýmanıtarlyq kómekterdi jaqsartý joldaryn izdestirýde eshbir kedergi qaldyrmaý úshin Pýtınmen kezdesýdi óziniń mindeti dep sanaıtynyn jetkizdi.
Nehammerdiń pikirinshe, Pýtınge onyń ustanymy men kózqarasy ózge eldermen múlde sáıkes kelmeıtinin túsindirý kerek.
"(Oǵan túsindirý) bir ret azdyq etedi. On ret azdyq etedi. Muny (túsindirýdi) 100 ret jasaý kerek shyǵar. Meniń oıymsha, Ýkraınada beıbitshilik ornap, adamdar qaýipsiz ómir súrýi úshin bárin jasaý kerek. Meıli telefonmen, meıli betpe-bet, áıteýir Pýtınge soǵys týraly shyndyqty, Ýkraınada bolyp jatqan ádiletsizdikti aıta berý kerek. Bul jerde Pýtınge Kreml qabyrǵalary syrtyndaǵy shyndyq qandaı ekenin jetkizýde ár únqatý mańyzdy" deıdi ol.
Nemistiń Deutsche Welle basylymy Nehammer kezdesý nátıjesi úmit uıalatpaǵanyn, Reseı Ýkraınanyń shyǵysyna jappaı shabýyl jasaǵaly otyrǵany anyq ekenin málim etkenin jazdy.
Avstrıa kansleri Pýtınge Zelenskıı kelissóz júrgizý úshin ózimen tikeleı baılanys ornatýǵa nıetti ekenin jetkizgenin, alaıda Pýtın Stambýl formatyndaǵy kelissózdi qup kóretinin bildirgenin atap ótti.
Reseı tarapy kelissóz barysy týraly aqparat taratpady.
Pikir qaldyrý