– Eń aldymen, men vaınerler, blogerler dep atalatyndar týraly aıtqym keledi. Olar basqa azamattarmen qatar qoldanystaǵy Konstıtýsıaǵa saı teń quqyqtary men mindetteri bar qarapaıym adamdar. Qylmystyq qýdalaý organdary úshin olardyń eshqandaı aıyrmashylyǵy joq, mártebesi nemese jumys ornynyń bolýy mańyzdy emes. Aıtaıyn degenim, ózderin vaıner atap júrgender (úsheý) qylmystyq jaýapkershilikke tartylady, – dedi QR İİM Tergeý departamentiniń bastyǵy Sanjar Ádilov.
Qazaqstandyq úsh vaıner qarjy pıramıdasyn qurdy jáne oǵan basshylyq etti dep aıyptalyp otyr. Tórebaev pen Shernıazov 1000 AEK mólsherinde (3 063 000 tenge) kepil ótep bosatylsa, Saıdbaevqa izdeý jarıalanǵan.
Sanjar Ádilovtiń aıtýynsha, vaınerlerdiń ekeýine qatysty prokýrordyń usynysy boıynsha sot kepil túrindegi bultartpaý sharasyn tańdaǵan. Al úshinshi vaıner Saıdbaev sotqa deıingi tergep-tekserý barysynda qashyp ketken.
– Búginde sottyń sanksıasymen ol syrttaı qamaýǵa alynyp, halyqaralyq izdeý jarıalandy, onyń júrgen jerin anyqtaý jáne qamaýǵa alý sharalary júrgizilip jatyr, – dedi Sanjar Ádilov.
Tergeý departamentiniń basshysy, búgingi tańda quzyrly organdar Mudarabah Capital-ǵa qatysty jetkilikti aıǵaq jınaǵanyn atap ótti. Zardap shekkenderge keltirilgen materıaldyq shyǵyndy óteý maqsatynda tergeýshiler Almaty, Nur-Sultan jáne Almaty oblysynda ornalasqan múlikterdi tárkiledi: tórt jer telimi, 10 páter, bes úı, eki kólik, bir dúken.
Sonymen qatar, osy iske qatysty aqsha da tárkilenip, qazir qamaýǵa alynǵan múlikti baǵalaý jumystary júrgizilip jatyr.
Pikir qaldyrý