Senat depýtattary áleýmettik jelilerdi buǵattaýǵa múmkindik beretin "Qazaqstan Respýblıkasynyń keıbir zańnamalyq aktilerine balanyń quqyǵyn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly" zań jobasyn májiliske qaıtardy.

Senat tóraǵasy Máýlen Áshimbaev zań jobasy qoǵamda qyzý talqylanǵanyn aıta kele, zań jobasyndaǵy áleýmettik jeliler men messendjerlerdiń jumysy shekteýge qatysty normalardy alyp tastady.

Depýtattar aqparat jáne qoǵamdyq damý mınıstrligine balaǵa qatysty kıberbýlıng dep tanylǵan aqparatty joıýǵa ǵana quzyret qaldyryp, ınternet-resýrstardyń, áleýmettik jeliler men messendjerlerdiń jumysyn shekteýge nemese toqtatýǵa qatysty ókiletin qysqartty.

Zań jobasynyń májilis maquldaǵan redaksıasynda áleýmettik jeliler men messendjerlerdi Qazaqstanda "zańdy ókilderin" taǵaıyndaýǵa, sonymen qatar, aqparat jáne qoǵamdyq damý mınıstrligi talap etken kontentti 24 saǵattyń ishinde óshirýge mindetteıtin tus bolǵan. Eger áleýmettik jeli ýákiletti organ talabyn oryndamasa, mınıstrlik jeliniń "Qazaqstan aýmaǵynda jumysyn shekteýge" quqyly.

Zań jobasyndaǵy osy túzetýler medıasarapshylar arasynda qyzý talqylanyp, olardyń narazylyǵyn týdyrǵan. Olardyń sózinshe, mınıstrlikke berý kózdelgen quzyret Facebook, Instagram, Youtube, Telegram, Whatsapp jáne basqa da jelilerdiń Qazaqstan ınternet keńistiginde jumys isteýine qaýip tóndiredi.

Atalǵan túzetýlerdi engizýmen aınalysqan jumys tobynyń qatarynda depýtattar Dınara Zakıeva men Aıdos Sarym bolǵan.