Búgin Qazaqstan Respýblıkasy Jumys berýshiler Ulttyq Konfederasıasy músheleriniń kezekten tys XII sezinde Konfederasıa Prezıdıýmynyń basshysy aýysyp, Prezıdıým tóraǵasy bolyp belgili kásipker, iri ónerkásiptik jáne áleýmettik jobalardyń negizin qalaýshy Jumabek Janyqulov Esilbekuly saılandy.

Jıynǵa myń jarymnan astam kompanıany qamtıtyn 23 qaýymdastyqtyń basshylary men 100-den astam bıznes ókilderi qatysty.

Sıez barysynda konfederasıany 22 jyl boıy basqaryp kelgen QR Premer-mınıstriniń eks-orynbasary Qadyr Baıkenov ókilettigin toqtatatty.

Prezıdıýmynyń jańa tóraǵasy Jumabek Janyqulov konfederasıanyń strategıalyq baǵyttaryn, orta merzimdi jáne uzaq merzimdi jumys josparlaryn belgiledi. Endi Konfederasıa áleýmettik jáne ekonomıkalyq baǵytta jumys berýshilerdiń múddelerin qorǵaý mısıasyn ózine júktep otyr.

Budan bólek jańa tóraǵa birqatar qurylymdyq jáne kadrlyq ózgeristerdi engizdi. Soǵan saı, prezıdıýmnyń jańa quramy quryldy. Oǵan Qundy metaldardy óndirýshiler asosıasıasynyń Bas dırektorynyń orynbasary, QR IIDM Indýstrıalyq damý komıtetiniń burynǵy tóraǵasy Qanat Baıtov, HeidelbergCement transulttyq kompanıasynyń Ortalyq Azıa boıynsha bas dırektory Voıseh Halat, «Qaǵanat» qoǵamdyq tamaqtaný jelisiniń negizin qalaýshy jáne ıesi Shynar Bógembaeva, Kásipker-mesenat, «Daco Motors Kazakhstan» JSHS kompanısynyń jáne birqatar áleýmettik jobalardyń negizin qalaýshy Syrymbek Taý, «Dentons» halyqaralyq zań kompanıasynyń Basqarýshy seriktesi Abaı Shaıkenov, Konfederasıa dıreksıasynyń Bas dırektory Aıdos Abıhanov sekildi belgili azamattar endi.

«PARYZ» Prezıdıýmynyń jańadan saılanǵan Tóraǵasy Jumabek Janyqulov óz sózinde "Myqty jáne táýelsiz áleýmettik-ekonomıkalyq ınstıtýttarsyz, turaqty ekonomıkasy bar jetilgen memleketti qalyptastyrý múmkin emestigin atap ótti.

Jumabek Janyqulov Qazaqstandaǵy beldeldi de belgili iri kásipker, mesenat. Talaı adamdy jumyspen qamtyp, ekonomıkaǵa ınvestısıa tartyp, el yrysyn arttyrýǵa úlken eńbek sińirgen, búdjetke qyrýar salyq tólep, qazynany baıytý jolynda qyzmet jasap júrgen atpal azamattardyń biri. Qazaqstannan munaı-gaz salasyndaǵy alpaýyt amerıkalyq transulttyq Halliburton kompanıasynyń fılıalyn ashýǵa kúsh salǵan. 31 jasynda elge 30 mıllımon dollar ınvestısıa tartyp, búginde memleketke tartqan ınvestısıadarynyń jalpy kólemi 100 mln dollardan asyp jyǵylady.

Jumabek Janyqulov ózin-ózi jasaǵan Self-made man tulǵa. Máselen, ol Almatydaǵy respýblıkalyq fızıka-matematıka mektebinde bilim alyp júrgende matematıkadan repetıtor jaldaý úshin tańnan turyp, mektep aýlasyn sypyryp, jastaıynan eńbekke aralasqan. Osylaısha kásipkerdiń bilimge, úırenýge, qatarynan qalmaýǵa degen zor talpynysy men ójettigi, tabandylyǵy men tózimdiligi jasynan baıqalǵan.

Jumys berýshiler Konfederasıasy 2000 jyly qurylyp, sodan beri Qazaqstanda áleýmettik áriptestikti ilgeriletýde, eńbek pen trıpartızmniń joǵary standarttaryn engizý maqsatynda qyzmet atqaryp keledi. Konfederasıanyń jumysyn halyqaralyq qaýymdastyq joǵary baǵalaǵan. Onyń qatarynda Konfederasıanyń seriktesi – BUU Halyqaralyq eńbek uıymy da bar.