Búgin shyǵystyń shyraıly mekeni Óskemen qalasynda halyqaralyq standarttarǵa saı keletin ústel tenısi ortalyǵynyń ashylý rásimi ótti. Bul respýblıka boıynsha mundaı maqsattaǵy sport keshenderiniń ishindegi eń irisi.

Osylaısha, shaharda taǵy bir sporttyq nysan el ıgiline paıdalanýǵa berildi. Bizdiń elimiz úshin ústel tenısi - eń tanymal jáne buqaralyq sport túrleriniń biri. Tek SHQO-da 450-den astam tenıs seksıalary jumys isteıdi, onda 11 myń adam aınalysady. Elimiz boıynsha eń iri mamandandyrylǵan ústel tenısi ortalyǵynda 58 ústel men 300-ge jýyq kórermen orny bar. Sondaı-aq eń joǵary deńgeıdegi halyqaralyq jarystardy qabyldaı alady.

Biregeı sport nysanynyń ashylý saltanatyna óńir basshysy Danıal Ahmetov, Olımpıada chempıony Olga Rypakova, stol tenısi federasıasynyń prezıdenti Danıar Abýlǵazın jáne sport jankúıerleri qatysty. Oblysta buqaralyq sportty damytýǵa erekshe kóńil bólinip keletini jaıly óńir basshysy erekshe atap ótip, bul sporttyq nysannan talaı jeńimpazdardyń shyǵatynyna senim bildirdi.

«Búgin biz úshin erekshe kún dostarym. Tenıs ortalyǵy halyqaralyq standarttarǵa saı. Álemdik deńgeıdegi básekelerdi ótkizýge tolyq múmkindigimiz bar. Bolashaqta Azıa, Álem chempıonattaryn ótkizetin kún alys emes» dedi SHQO ákimi Danıal Ahmetov.

Bul jerde tek balalar men eresekter ǵana emes, sondaı-aq sporttyń osy túrimen shuǵyldanatyn, barlyq qajetti jaǵdaılar jasalǵan erekshe qajettilikteri bar adamdar da aınalysa alatyny óte mańyzdy. Óskemen qalasynyń turǵyndary kásibı jáne áýesqoı sportpen aınalysýǵa barlyq múmkindikteri bar. Ortalyqta ústel tenısinen arnaıy ashylǵan balalar men jasóspirimder sport mektebi jumys isteıdi, ol úshin kásibı jattyqtyrýshylar eńbek etedi. Sondaı-aq ǵımaratta sportshylardy ońaltý jáne fızıoterapıaǵa arnalǵan eń zamanaýı jabdyqtarmen jabdyqtalǵan medısınalyq dıspanser ornalasqan.

Búginde Memleket basshysy Qasym-Jomart Kemeluly Toqaev buqaralyq sportty damytýǵa erekshe kóńil bólýde. Óskemen qalasynda ashylǵan stol tenısi ortalyǵy halyqtyń sportqa degen qyzyǵýshylyǵyn arttyryp, bolashaq chempıondardy tárbıeleıtin nysan bolary anyq.