Búgin otyz kún boıy oraza tutqan Almaty jamaǵaty Oraza aıt namazyn oqýǵa jınaldy. Eki jyl aıt namazyn oqı almaǵan qala jurtshylyǵy Ortalyq meshittiń ishi men syrtyna lyq toldy.

Shahardyń bas ımamy Tólebı Dádiluly aıt merekesine jınalǵan jamaǵatqa oraza aıtty toılaýdyń tártibi men máni men mańyzdylyǵy týrasynda ýaǵyz aıtty.

«Oraza aıt meıramy – adamdardyń kóńiline qýanysh syılap, janyn jadyratatyn ulyq mereke. Ásili, Oraza aıt qasıetti Ramazan aıy aıaqtalǵanynyń belgisi ǵana emes, ol – bir aılyq qulshylyǵymyzdyń qýanyshy men jemisi. Bul – arazdasqan adamdar tatýlasyp, týysqandyq baılanysty kúsheıtetin meıram. Alla Taǵala Quranda: «Sen keshirim jolyn ustan, jaqsylyqqa buıyr, nadandyqtan bet bur», - dep (Aǵraf, 199) musylmandardy barynsha keshirimdi bolýǵa shaqyrǵan. Sol sebepti, renjisip qalǵan kisilermen tatýlasý, qatynas úzilgen týystardyń úılerin arnaıy aralaý da aıt kúnderi asa mańyzdy», - dedi bas ımam.  

Qala ákimi Erbolat Dosaevtyń Aıt merekesimen arnaıy quttyqtaýyn qala ákiminiń orynbasary Arman Orazbaıuly almatylyq jamaǵatqa jetkizdi.

«Barshańyzdy musylman qaýymy úshin qasıetti Oraza aıt meıramymen shyn júrekten quttyqtaımyn! Memleket basshysy Qasym-Jomart Toqaev aıtqandaı, «Ramazan aıyna jalǵasqan bul jarqyn mereke qasterli dinimizdegi meıirim men shapaǵat, janashyrlyq pen qamqorlyq sıaqty asyl qundylyqtardy dáripteıdi» Oraza aıt merekesinde tilegen barlyq duǵa-tilekterińiz qabyl bolsyn!» delingen qala ákiminiń quttyqtaý hatynda.

Aıt namazynan soń kásipkerlerdiń demeýshiligimen 200 balaǵa aıttyq syılyqtar úlestirildi. Ortalyq meshittiń alańynda 500 adamǵa aıttyq dastarhan jaıylyp, jamaǵat yntymaǵy men birligi úshin ulttyq oıyndardan saıystar ótkizildi. Júldeli oryn alǵan qatysýshylarǵa qarjylaı jáne baǵaly syılyqtar berildi.

Osylaısha almatylyq musylman jamaǵaty aıt merekesin ımandylyq sán-saltanatyna saı atap ótti.

Derekkóz: Asan.kz