Otan qorǵaýshylar kúni men QR Qarýly Kúshteriniń qurylǵanyna 30 jyl tolýyna oraı elordada «AMANAT» jastar qanaty uıymdastyrǵan «Qaisar» áskerı-patrıottyq oıyndarynyń fınaldyq kezeńi ótti, dep habarlady partıanyń baspasóz qyzmeti.
Jabylý saltanatyna partıanyń atqarýshy hatshysy Asqat Oralov, qorǵanys mınıstrliginiń ókilderi, parlament depýtattary jáne qarýly kúshterdiń ardagerleri qatysty.
Eldiń barlyq óńirindegi 10-11 synyptardyń 1700 oqýshysynyń ishinen iriktelgen 100-den astam fınalıst eki kún boıy júzýden, kedergiler jolaǵynan ótýden jarysty jáne «Meniń elim – Qazaqstan» taqyrybynda áskerı-tarıhı vıktorınaǵa qatysty.
Oıynnyń nátıjesi boıynsha, birinshi oryndy Mańǵystaý oblysynyń komandasy ıelendi. Al ekinshi oryndy Qaraǵandy oblysynyń oqýshylary alsa, úshinshi oryn Shyǵys Qazaqstan oblysynyń komandasyna buıyrdy.
Jeńimpazdardy marapattaǵan «AMANAT» partıasynyń Atqarýshy hatshysy Asqat Oralov jobanyń basty maqsaty – jastardyń boıynda patrıottyq sanany jáne áskerı qyzmetke degen qyzyǵýshylyqty qalyptastyrý ekenin atap ótti.
– Bul – jyl sońyna deıin josparlanǵan túrli is-sharalardyń alǵashqysy. «Qaisar» jobasy aıasynda barlyǵy 25 myń jasty qamtý kózdelip otyr. Jalpy, partıany transformasıalaý aıasynda jastar qanatyn qaıta jandandyrý jumystary qarqyndy júrgizilýde. Ekologıalyq mádenıetti qalyptastyrýǵa baǵyttalǵan «TazaLike» jobasy iske qosyldy. Jaqyn arada aýyl jastarynyń áleýetin kóterýge baǵyttalǵan «Órleu» jobasyn júzege asyrý bastalady, – dedi Asqat Oralov.
Sondaı-aq, partıanyń atqarýshy hatshysy áskerı qyzmetshiler men armıa ardagerlerin Qazaqstan Respýblıkasy Qarýly Kúshteriniń qurylǵanyna 30 jyl tolýymen quttyqtady. Ol memleket basshysy Qasym-Jomart Toqaev elimizdiń táýelsizdigi men ulttyq múddesin qorǵap turǵan, áskerı antyna adal patrıottardy qoldaýǵa erekshe nazar aýdaratynyn atap ótti.
– Bizdiń sarbazdar TMD elderi qarýly kúshteri arasynda úzdikter qatarynda. Oǵan áskerı qyzmetshilerdiń jyl saıynǵy túrli halyqaralyq oqý-jattyǵýlarǵa qatysýy men armıa oıyndaryndaǵy jeńisteri dálel bola alady. Bolashaqta el táýelsizdigin tuǵyrly etetin ol – búgingi jastar. Olardyń áskerge degen qyzyǵýshylyǵyn arttyratyn osyndaı «Qaisar» sıaqty jobalardyń mańyzy óte zor, – dedi jıynnyń jabylý saltanatynda QR Qorǵanys mınıstriniń birinshi orynbasary Marat Qusaıynov.
Halyq qaharmany, general-leıtenant Baqytjan Ertaev joba qatysýshylaryna jaýyngerlik erlikterdiń tarıhy týraly aıtyp berdi. Ol jastardy patrıot bolýǵa shaqyryp, Otan qorǵaýdan artyq mamandyq joq ekenine toqtaldy.
– Bizge áskerı bólimde arnaıy ekskýrsıa ótkizip, qarý-jaraq túrlerimen tanystyrdy. «Qaisar» dıalog alańy aıasynda ofıserler áskerı ómirdiń qyr-syryna qatysty barlyq suraqtarymyzǵa jaýap berdi. Osy jobanyń arqasynda barlyq qatysýshylar shyn máninde bir-birin jaqyn tartyp, ózderine elimizdiń túkpir-túkpirinen jańa dostar tapty, – dep óz áserimen bólisti Túrkistan oblysynan kelgen qatysýshy Ádil Anarbaı.
Pikir qaldyrý