Telejýrnalıst, jazýshy Esbolat Aıdabosyn Almaty oblysyn ekige bólý arqyly qurylǵaly jatqan burynǵy Taldyqorǵan oblysynyń aýmaǵyn Jetisý dep ataý tarıhı ataýdyń maǵynasyn taryltady, ákimshilik aýmaqty eskishe Taldyqorǵan dep ataǵan jón dep másele kóterdi.
Onyń aıtýynsha, Jetisý qaı jaǵynan kelseń de ákimshilik bóliniske baǵynbas geografıalyq-rýhanı keńistik.
"Buryndary pushpaǵy kertilgen Jetisý bıylǵy kóktemde qaq ortasynan bólindi. Alyp keńistik taǵy taryldy. Bul ákimshilik basqarýǵa qolaıly shyǵar, biraq óńirdiń tarıhı, mádenı keńistigine nuqsan keltirerlik is. Másele bóliniste emes, másele – ataýda. Jetisý oblysynyń qaramaǵyna ótken segiz aýdannyń turǵyndary ǵana endi ózderin "jetisýlyqpen" dep erkin aıta alady. Almaty oblysyna qarap qalǵan Narynqol, Qaskeleń, Uzynaǵash halqy birte-birte bul ataýdan qol úzedi. Sosyn umytady. "Almatylyqpyn" der, basqa der... "Jetisýlyqpyn" dese tyńdaýshyny shatastyrýy múmkin. Osyndaıda "burynǵysha Taldyqorǵan oblysy dep ataı salaıyq, elge, jerge qıanat bolmasyn" dep prezıdentke keńes beretin bir adam tabylmaǵany qalaı?! Sonda "Jetisý jerinde eki oblys bar – Almaty jáne Taldyqorǵan" dep balaǵa da, basqaǵa da túsindire berer edik-aý. Endi ózim de túsinbeı otyrmyn. Úlken úıdiń ataýyn kishi úıge berip, úlken atty qoldan kishireıtkennen kim, ne utty? Túsindirgishter bolsa marhabbat!" deıdi jýrnalıs jelidegi jazbasynda.
Esbolat Aıdabosyn Aqmola oblysyn Saryarqa dep ataıyq deseń arqanyń esi durys azamattarynyń bári qarsy shyǵady dep sanaıdy. Óıtkeni bul – ákimshilik bóliniske baǵynbaıtyn alyp keńistik, geografıalyq qana emes, tarıhı-mádenı aýmaq ekenin, Jetisý da sondaı ekenin aıtady.
"Biraq Jetisýdy bólshektep tastady. Jańa Qazaqstandaǵy úlken qatelik! Jetisýdan shyqqan shendisi bar, shekpendisi bar, depýtaty, ǵalym, aqyn, jazýshysy myńq etpeı, osy qatelikke qol soǵyp, qoldap otyr" deıdi ol.
Pikir qaldyrý