2022 jylǵy 1 sáýirden bastap aılyq eseptik kórsetkish 3 063 teńgeden 3 180 teńgege deıin joǵarylady. Osyǵan baılanysty eń tómengi kúnkóris deńgeıi, zeınetaqy men járdemaqy tólemderiniń mólsheri ózgeriske ushyrady.
Memlekettik kirister komıtetiniń málimetinshe, eldegi qymbatshylyq deńgeıiniń joǵary bolýyna baılanysty 2022 jylǵa ınflásıa dálizi 4-6%-dan 8-10%-ǵa deıin ulǵaıtylǵan.
"Osyǵan baılanysty, 2022 jylǵy 1 sáýirden bastap barlyq áleýmettik tólemderdi esepteý úshin qoldanylatyn aılyq eseptik kórsetkish 3 063 teńgeden 3 180 teńgege deıin jáne eń tómengi kúnkóris deńgeıi 36 018 teńgeden 37 389 teńgege deıin ósti. Osyny eskere otyryp, 2022 jylǵy 1 sáýirden bastap zeınetaqy tólemderi men járdemaqylardyń mólsheri qosymsha 4%-ǵa arttyryldy. Jalpy alǵanda 2022 jyly zeınetaqy tólemderiniń ósýi aldyńǵy jylǵa qaraǵanda 11%-dy (ınflásıa deńgeıinen 2%-ǵa oza otyryp), bazalyq zeınetaqy tólemi men járdemaqylardyń ósýi 9%-dy qurady" delingen komıtet habarlamasynda.
Al aıyppul mólsheri ózgerissiz qalmaq. Aıyppul sanksıalary, salyqtar jáne QR zańnamasyna sáıkes basqa da tólemder úshin jyl sońyna deıin 2022 jylǵy 1 qańtardan bastap belgilengen 3 063 teńge mólsherindegi aılyq eseptik kórsetkish qoldanyla beredi.
Pikir qaldyrý