2019 jyly bir túnde 20 bas sıyryn urlap ketken Almaty oblysy Aqsý aýdany Qyzylaǵash aýylynyń turǵyny Álesh Azdanhanuly urlanǵan sıyrlarynyń biri jaqynda qorasyn taýyp kelgenin aıtady. İri qaralary da, urlyqshylar da tabylady degennen kúder úzgen aqsaqal endi urlyq isin qaıta ashyp, tergeýdi jalǵastyrýǵa aıǵaq paıda boldy dep otyr.

2020 jylǵy 5 qazanda "Qamshy" redaksıasyna Álesh Azdanhanulynyń kelinshegi Kamash Nurdanbektiń haty shyqqan. Ol jerde joǵalǵan jıyrma bas sıyrdy izdeýge jergilikti polısıa qyzmetkerleri qulyq tanytpaı otyrǵany, tergeý barysynda qısynǵa kelmeıtin, kúdik uıalatatyn jaǵdaılar bolǵany aıtylady. Qamshy redaksıasy Almaty oblysynyń ákimine resmı saýal joldap, is tıisti organdarǵa júkteldi degenge saıatyn jaýap alǵan. Alaıda qoldy bolǵan mal tabylmaǵan.

Endi mine, urlanǵan sıyrdyń biri qorasyna óz aıaǵymen kelip otyr. Álesh Azdanhanuly qorasynyń mańynda sıyry móńirep turǵanyn tań atqanda kórip, qunajyn kezinde qoldy bolǵan sıyrdy jazbaı tanıdy. Onyń ústine ózi salǵan en men tańba da tur.

Kezindegi urlyqtyń izine túsirip qala ma dep, aýyldyq Whatsapp topqa qorasyna bóten mal kelip turǵanyn jazady. Uzamaı Jandos esimdi aýyldasy "sıyrdyń ıesi men" dep keledi. Oǵan mán-jaıdy túsindiredi. Áńgimelesý barysynda Jandos sıyrdy Kádirbek degen aýyldasynan satyp alǵany anyqtalady. Álesh Azdanhanuly aýyldasy Kádirbekpen sóıleskeninde ol sıyrdy ózimdiki dep bolmaıdy. Álesh aqsaqal "mal meniki" deıdi. Álesh Azdanhanuly "uzamaı janjalǵa Kádirbektiń qyzy aralasyp, sıyr ózderiniki emes degennen keıin ǵana Kádirbek iri qarany aýyl mańyndaǵy fazendadan satyp alǵanyn aıtty" deıdi. Álesh Azdanhanulynyń sózinshe, fazendadaǵylar birese mal bizdiki emes, birese bizdiki dep eki sóıleıdi.

Joq izdegen aqsaqal Kádirbek pen fazendadaǵylardyń ym-jymy bir ma dep kúdiktenedi. Endi polısıaǵa shaǵym túsirip, urlyq isin tergeýdi qaıta jandandyrǵysy keledi. Biraq kókeıinde qylmystyq isti kezindegideı jyly jaýyp qoıa sala ma degen qorqynyshy taǵy bar.

Álesh Azdanhanuly Qyzylaǵash aýylynda mal urlyǵy órship turǵanyn, urlyqshylar talaı eldi qan qaqsatyp, kóp jaǵdaıda tabylmaıtynyn aıtady. Polısıada urlyqshylardy qorǵap, isin jaýyp otyratyn qamqorshysy bolýy múmkin degen oıy da joq emes.