Qazaqstan aýmaǵynan 700 myń dollarǵa jýyq qarajatty zańsyz túrde shyǵaryp almaq bolǵan. Bul týraly Memlekettik kirister komıteti habarlady. 

"2022 jyldyń naýryz-sáýir aılarynda kedendik shekara arqyly jalpy somasy 671 myń AQSH dollaryna teń keletin qolma-qol aqsha qarajatyn zańsyz ótkizýdiń 40 faktisi anyqtaldy. Onyń ishinde, sheteldik valútany syrtqa alyp ketýge tyıym salý kúshine engen soń, kedendik shekara arqyly jalpy somasy 280 myń AQSH dollaryn quraıtyn qolma-qol aqshany kedendik shekara arqyly alyp ketpek bolǵan 21 fakt anyqtalǵan. Barlyq oryn alǵan jaǵdaılar Nur-Sultan (6 fakt) jáne Almaty (15 fakt) qalalarynyń halyqaralyq áýejaılarynda ornalasqan keden beketterinde tirkeldi" delingen habarlamada. 

Barlyq tulǵalar QR "Ákimshilik quqyq buzýshylyq týraly kodeksiniń" 551 jáne 545-baptary boıynsha ákimshilik jaýapkershilikke tartylǵan.