5 maýsymda Konstıtýsıaǵa ózgerister men tolyqtyrýlardy qabyldaý máselesi boıynsha respýblıkalyq referendým ótkiziledi. Erteń, 4 maýsymda saǵat 00:00-de referendým aldyndaǵy úgit júrgizý aıaqtalady. Bul týraly Bas prokýratýranyń baspasóz qyzmeti habarlady. 

"Úgitke, sonyń ishinde qoǵamdyq pikirge suraý salý nátıjelerin nemese referendým nátıjeleriniń boljamdaryn jarıalaýǵa referendým ótkiziletin kúnniń aldyndaǵy kúni jáne referendým ótkiziletin kúni, ıaǵnı 4 jáne 5 maýsymda tyıym salynady (Konstıtýsıalyq zańnyń 7-babynyń 4-tarmaǵy)", dep habarlady Bas prokýratýra. 

Bul kúnderi úgit-nasıhat júrgizgen adamdar ákimshilik kodekstiń 102-baby (Saılaý aldyndaǵy úgitti oǵan tyıym salynǵan kezeńde júrgizý) boıynsha jaýapqa tartylady. Oǵan saı, jeke tulǵalarǵa 15, shaǵyn kásipkerlik sýbektilerine nemese komersıalyq emes uıymdarǵa 20, orta kásipkerlik sýbektilerine 25, iri kásipkerlik sýbektilerine 35 aılyq eseptik kórsetkish mólsherinde aıyppul salynady.