Májilis tóraǵasy Erlan Qoshanov Túrkitildes elder Parlamenttik Assambleıasynyń (TúrkPA) bas hatshysy Mehmet Súreııa Erdi qabyldady.

Kezdesý barysynda Erlan Qoshanov elimiz táýelsizdik tarıhynda jańa kezeńge qadam basyp otyrǵanyn atap ótti.

– Bizdiń Prezıdentimiz konstıtýsıalyq ózgeristerge baılanysty referendým ótkizý týraly bastama kóterdi. Bul ýaqyt talabynan jáne qoǵam suranysynan týyndap otyrǵan tarıhı sheshim. Osyǵan baılanysty elimizge TúrkPA-nyń baıqaýshylary da keldi. Bul jumysqa ózińiz de atsalysyp otyrsyz, – dedi májilis tóraǵasy.

Óz kezeginde S.Er aldaǵy referendýmnyń sátti ótetinine tilektestik bildirip, bul Qazaqstannyń odan ári damýy jolyndaǵy mańyzdy kezeń bolatynyna senim bildirdi.

– Biz Qazaqstandy Eýrazıanyń jarqyraǵan juldyzy dep bilemiz. Qazaqstan Prezıdenti Qasym-Jomart Toqaevtyń halyqqa joldaýyna ózi atap ótken reforamalar negizinde Ata zańǵa ózgerister engizilgeli otyr. Sondyqtan aldaǵy referendýmnyń sátti ótýine shyn júrekten tilektespin, – dedi TúrkPA-nyń Bas hatshysy.

Májilis tóraǵasy Erlan Qoshanov Mehmet Erge respýblıkalyq referendým jumysyna qatysýǵa belsendilik tanytqany úshin rızashylyq bildirdi.

Sonymen qatar kezdesýde taraptar Qyrǵyzstanda ótetin TúrkPA-nyń Hİ Keńesi men jalpy otyrysyna qatysty máselelerdi talqylady. Atalǵan jıynda uıymnyń 2023-2028 jyldarǵa arnalǵan Strategıalyq jol kartasyn bekitý josparlanǵan.        

Májilistiń baspasóz qyzmeti