Májilis Tóraǵasy Erlan Qoshanov Túrkitildes elder Parlamenttik Assambleıasy mısıasynyń baıqaýshylarymen kezdesti.

Basqosýǵa Túrkıa Respýblıkasy Uly Ulttyq  Jınalysynyń depýtaty Redjep Sheker, Ázerbaıjan Respýblıkasy Mıllı Medjılısiniń depýtaty Hıkmet Mamedov, Qyrǵyz Respýblıkasy Jogorký Keneshiniń depýtaty Cholpon Sýltanbekova jáne TúrkPA Bas hatshysy Mehmet Súreııa Er qatysty.

Májilis Spıkeri bul kezdesýdiń Qazaqstan úshin jaýapty ári tarıhı kezeńde ótip jatqanyn atap ótti.

«Eki kúnnen keıin ótetin úlken saıası naýqan – respýblıkalyq referendým barysyn baıqaýǵa arnaıy kelgen TúrkPA delegasıasyna shyn júrekten alǵysymdy bildiremin. 5 maýsymda sizderdiń mısıa halyq belsendiligine kýá bolyp, ádil baǵasyn beredi dep oılaımyn», – dedi Erlan Qoshanov.

Óz kezeginde, baıqaýshylar Konstıtýsıalyq reformalar Qazaqstannyń odan ári damýyna tyń serpin beretinine senim bildirdi.

«Demokratıa – únemi damyp otyratyn proses. Osy oraıda Májilistiń róli erekshe. 1995 jyldan keıin ótkizilip otyrǵan referendýmnyń da mańyzy zor dep oılaımyn. Jeksenbi kúni ótetin naýqan Qazaqstan halqy jáne jalpy túrki jurty úshin jaqsylyqtyń nyshany bolady degen senimdimiz. Baýyrlas qazaq eli jarqyn bolashaqqa nyq qadam jasaıdy dep bilemiz», – dedi Túrkıa Respýblıkasy Uly Ulttyq  Jınalysynyń depýtaty Redjep Sheker.

Kezdesý sońynda Erlan Qoshanov kópjaqty baılanystardy nyǵaıtýda parlamentaralyq yntymaqtastyqtyń mańyzy zor ekenin aıtty.