Qazaqstanda Konstıtýsıaǵa engiziletin túzetýler boıynsha referendým bastaldy. Shyǵys Qazaqstan oblysynyń ýchaskelerinde tańǵy saǵat 7.00-den bastap saılaýshylardyń úlken legi baıqalady.

SHQO Ulan aýdanynyń turǵyndary 88 jastaǵy Qasenjar Eskendirov pen 85 jastaǵy Shamzada Eskendirova azamattyq jaýapkershilik deńgeıin jáne osy oqıǵanyń mańyzdylyǵyn sezinip, alǵashqylardyń biri bolyp referendým ýchaskesine kelip, óz tańdaýlaryn jasady.

"Usynylyp otyrǵan túzetýlerdiń mańyzdylyǵyn túsine otyryp, biz búgin daýys berýge keldik. Óıtkeni, bul ár azamattyń quqyǵy, - dedi Qasenjar aqsaqal.

Qarıa batasyn berip, Qazaqstan halqyna beıbitshilik pen baq-bereke tiledi.

"Men árqashan Birinshi bolyp daýys beremin jáne búgin birinshi bolyp daýys berdim. Óıtkeni, bul óte mańyzdy oqıǵa. Referendým men úshin mereke, sondyqtan men árbir daýys berýshi úshin jaýapkershilikti túsinemin", - dedi Kýrchatov qalasynyń turǵyny Qarlyǵash Bazylova.

Oblystaǵy barlyq eldi mekenderde ýchaskelerdegi belsendilik baıqalady. Mysaly, Besqaraǵaı aýdanyndaǵy 411 referendým ýchaskesinde alǵash ret Qarlyǵash Mádenıetqyzy daýys berdi. Komısıa músheleri estelik retinde syılyq tabys etti.

Osy ýaqytta Óskemende 120 referendým ýchaske óz esigin ashty, 110 ýchaskede baqylaýshylar tirkeldi. Alǵashqy daýys berýshilerge estelik syılyqtar berildi.

Óńirlik saılaý komısıasynyń derekteri boıynsha, SHQO-da barlyq 1027 ýchaske, onyń ishinde 959 ashyq ýchaske jáne azamattardyń ýaqytsha bolý oryndarynda 68 ýchaske jumys isteıdi. Oblystyq aýmaqtyq referendým komısıasynda 9114 esepten shyǵarý kýáligi daıyndaldy. Esepten shyǵarý kýáligin alǵan azamattar basqa eldi mekenderde daýys bere alady. (Bir eldi meken sheginde esepten shyǵarý kýálikteri berilmeıdi).

Oblys boıynsha 911 455 azamat referendýmǵa qatysýǵa quqyly

SHQO Aqparat ortalyǵy