Tehnologıa salasyndaǵy álemdik alpaýyt Apple kompanıasy smartfondarǵa arnalǵan iOS16 operasıalyq júıesine qazaq tilin qosty. Bul týraly Sıfrlyq damý, ınovasıalar men aeroǵarysh ónerkásibi mınıstri Baǵdat Mýsın málim etti.
"Búgin Apple álem kútken jańashyldyqty jarıa etti. Bizdiń el úshin bul prezentasıa asa mańyzdy, sebebi jańa iOS16 operasıalyq júıesine QAZAQ TİLİ qosyldy, avtotúzetý fýnksıasymen. 2019 jyly resmı tizimge engizilse, endi jasandy ıntellekttiń avtomatty túrde túzetetin fýnksıalarymen iske qosyldy. Bul – qazaqtildi qoldanýshylar sany artyp, ana tilimizdi álem moıyndap jatyr degen sóz" dedi mınıstr áleýmettik jelidegi paraqshasynda.
Komýnıkasıa salasy boıynsha sarapshy Aıbar Oljaev Iphone-da qazaq tiliniń paıda bolatyny qazaq tiliniń bolashaǵyna degen halyqaralyq senimniń belgisi ekenin aıtady.
"Qazaq tili endi eshqashan ólmeıtin boldy jáne barlyq daǵdarysty eńserip shyqty. Sebebi, álemdik bıznes prosesterde qazaq tilin eleý, sanasý trendteri bastalyp ketti. Apple óziniń IOS operasıalyq júıesine qazaq tilin sıstemalyq til qylyp engizip otyr. AQSH ishki jalpy óniminiń 6 paıyzyn berip otyrǵan Apple álemde Saudi Aramcodan keıingi eń qymbat kompanıa. Al Iphone – eń ataýly smartfon. Qazaq tiliniń oǵan ilinýi – onyń bolashaǵyna degen halyqaralyq senimniń belgisi. Jalpy, mamyr-maýsym aılary qazaq tiline kóptegen jaqsy jańalyqtar alyp keldi. Apple-di aıttyq, odan bólek, Nickelodeon qazaqshaǵa aýysty. Qazaqtildi komýnıkasıa mamany bolǵandyqtan, bıyldan bastap tili qazaqshalanbaǵan kóptegen álemdik iri brend, kompanıalar tarapynan mennen keńes suraý, aýdıtorıanyń erekshelikterin bilýge degen suranystar kóbeıdi. Sondyqtan, trend degende – men shynymen de kózben kórip, qolmen ustaǵan nársemdi aıtyp otyrmyn" deıdi maman jelidegi jazbasynda.
Pikir qaldyrý