Qańtar oqıǵalary mańdaıynan oq tıip qaza tapqan 4 jasar Aıkórkem Meldehannyń januıasy UQK qyzmetkerleriniń qoqan-loqysynan keıin shetelge ketip qalǵan. Bul týraly Orda.kz aqparat portaly habarlady.
Basylym Aıkórkemniń ákesi Aıdos Meldehan UQK qyzmetkerleri birneshe márte kelip, qoqan-loqy kórsetkenin aıtqanyn, olarǵa azaly otbasynyń belsendiligi, tergeýdi talap etip, jýrnalıserge suhbat bergeni unamaı qalǵanyn jazady. Sondyqtan otbasymen shetelge ketýge májbúr bolǵanyn, qaýipsizdikteri úshin qaıda ketkenin aıta almaıtynyn jetkizgen.
Búginde qandy oqıǵa kezinde jaralanǵan ózge balalardyń jaǵdaıy da máz emes. Aıdos Meldehannyń 15 jastaǵy qyzynyń denesinde áli de 8 jaraqat jaryqshaǵy bar. Ony shyǵarý múmkin bolmaı tur. Jaraly qyz úıinen shyqpaıdy, qozǵalýy qıyn. Mektepti onlaın bitirgen. Úıdegi kenshe ulmen psıholog jumys istep jatyr. Álige deıin qorqady. Posttravmatıkalyq shok alǵan.
4 jastaǵy Aıkórkem Meldehan 7 qańtar kúni qaza tapqan. Meldehan áýleti keshki ýaqytta azyq-túlik izdep kólikpen Sátpaev kóshesiniń boıymen ketip bara jatqan. Almaty ákimdiginiń mańyna taıaǵanda áldekimder kólikti atqylaı bastaıdy. Kólikte Aıdos Meldehannyń Aıkórkemnen ózge bir uly men qyzy bolǵan. Ekeýi de jaralanǵan. Al Aıkórkemdi aman alyp qalý múmkin bolmady. Oq onyń mańdaıyna tıgen. Aıdos Meldehan kólik shanaǵynan 20 oq izin tapqanyn aıtady. Sózinshe, balıstıka saraptamasy oq áskerıler qoldanatyn qarýǵa tıesili ekenin anyqtaǵan.
Azaly otbasyǵa Almaty ákimdigi úsh bólmeli páter berip, Meldehan áýleti páterge kúni keshe ǵana tirkeýge turǵan. Sondaı-aq birer kún buryn ǵana "Qazaqstan halqyna" qory tarapynan taǵaıyndalǵan aqshalaı ótemaqyny alý boıynsha qujattar tizbesi jazylǵan habarlama alǵan.
3 maýsymda Jarokov-Myńbaev kósheleriniń qıylysynda Aıkórkemniń beınesimen jáne "Qaı aǵa meni atqan" degen jazýmen graffıtı paıda bolǵan. Alaıda ony birden óshirip tastady.
