Kásipker, "PARYZ" prezıdıýmynyń tóraǵasy Jumabek Janyqulov Peterbýrg halyqaralyq ekonomıkalyq forýmynyń 25 jyldyq mereıtoıyna qatysyp, búgingi kúrdeli geosaıası ahýaldaǵy kásipkerlerdiń máselesi týraly aıtty.

Jumabek Janyqulov Qazaqstan jaǵdaıynda ósimniń jańa núktelerin tabý máselesi asa ózekti bolyp otyrǵanyn atap ótti. Sózinshe, bıznes týyndaǵan qıyndyqtar týraly halyqaralyq alańdarda aıtýdan qysylmaýy kerek. Osy oraıda maman reseılik, qazaqstandyq kásipkerlerdi qosalqy sanksıa tolqynyna ilinip ketpeýdiń jaıy tolǵandyratynyn, baǵdarsyzdyq ornap turǵandyqtan naqty sheshim qabyldaýy qıyn bolyp otyrǵanyn jetkizdi.

– Qazir qazaqstandyq orta jáne iri kásipkerlerge shetelden qural-jabdyq aldyrarda "múmkin sender ony Reseıge jetkizeıin dep jatqan shyǵarsyńdar" degen kúdikpen bas tartyp jatatyn nemese jetkizý merzimin sozylyp jaǵdaılar kezdesedi. Osylaısha, qazaqstandyq bıznes qalasyn, qalamasyn qosalqy sanksıaǵa ilinip ketip jatyr. Osy máseleni Jenevada talqyladyq. Qosalqy sanksıaǵa ilinip ketpeý joldaryn usyndyq. Qazir anaý bolmaı qalsa she, mynaǵan ruhsat bermeı qoısa qaıtemiz degen qańqý sóz deńgeıinde júrmiz. Biz osyny talqylaǵan kezde, shetelden qural-jabdyq pen shıkizat satyp alyp, ónim óndiretin qazaqstandyq kásiporyndardy alys elderge, sonyń ishinde Reseıge satýǵa ruhsat berý máselesin kóterdik. Ekinshi problema – logıstıka. Barlyq Orta azıa elderi muhıtqa tek Reseı arqyly shyǵa alady. Al qazir Eýropa tarapynan da, Reseı tarapynan da belgili bir shekteýler bar. Logıstıka basty draıver ekenin túsine otyryp, máseleni sheshý úshin osylaı qoryqpaı talqylap, bızneske serpilis berý jaǵyn qarastyrý qajet. Jańa nárseni shyǵarýǵa yntalandyrý kerek. Qazaqstan bıznes qaýymdastyǵynyń atynan, barlyq kásipkerlerge Qazaqstanda búgingi jaǵdaıda jańa nárseni shyǵarýǵa, shıkizat, qural-jabdyq satyp alýǵa, ónimdi eksporttaýǵa biregeı múmkindik baryn aıtqym keledi, – degen ol saıası ahýal qandaı bolmasyn bıznes ónip-órkendeýi kerektigin atap ótti.