Bıyl elimizdiń bas qalasy óziniń 24 jyldyǵyn atap ótip jatyr. Elorda kúnine oraı mádenıet, sport mekemeleri, qalanyń shyǵarmashylyq ujymdary kóńildi, merekelik baǵdarlama daıyndap otyr.Qala turǵyndary men qonaqtary konsert, kórme, festıvál, premera jáne t.b. tamashalaı alady, dep habarlady Nur-Sultan ákimdiginiń resmı saıty.
Elordanyń 24 jyldyǵyna oraı qalada birqatar áleýmettik nysannyń, gúlzarlardyń, qoǵamdyq keńistikterdiń, 80-nen asa aýlanyń saltanatty ashylýy ótedi. Budan bólek, osy kúnge oraı elordanyń birqatar vedimistik baǵynysty uıymdary konsertter, sporttyq týrnırler, kórmeler jáne t.b. uıymdastyrady.
28 maýsym kúni saǵat 19:00-de memlekettik akademıalyq fılarmonıa sahnasynda Ermurat Úsenovtiń 70 jyldyǵyna arnalǵan "Qorqyt" etno-ansambli "Ómir dastan" konsertin qoıady.
Osy kúni elordada erler men áıelder arasynda bokstan "Elorda kýbogy" halyqaralyq týrnıri bastalady. Ol Jaqsylyq Úshkempirov atyndaǵy Jekpe-jek saraıynda 5 shildege deıin ótedi.
30 maýsymda "Jastar" teatrynda sýretshi Gúlnazym Ómirzaqtyń kórmesin, sondaı-aq dızaıner Altynbek Ermuhannyń sán kórsetilimin tamashalaýǵa bolady.
1-6 shilde aralyǵynda "Atameken" etno-memorıaldyq kesheninde "Elorda peızajdary" atty art-kórme uıymdastyrylady.
Birikken mýzeıler dıreksıasy merekege oraı birden birneshe ekspozısıa uıymdastyrady: 1-8 shilde aralyǵynda – "El tiregi – Elorda" kórmesi, 1-5 shilde aralyǵynda –"Kıeli meniń astanam" fotokórmesi. 5 shilde kúni munda "Álem kartasyndaǵy jańa elorda" atty is-shara ótedi.
1 shilde kúni saǵat 20:00-de Esil ózeni jaǵalaýyndaǵy amfıteatrda Batyrhan Shúkenovtiń shyǵarmashylyǵyna arnalǵan "Tvoı shagı" atty konsert ótedi. 3 shilde kúni saǵat 20:30-da EKSPO alańynda Ulttyq dombyra kúni atalyp ótedi. Sol kúni saǵat 18:00-de elordalyq fılarmonıa merekelik konsertke shaqyrady. Sol sıaqty "Barys Arena" muz saraıynda qazaq kúresinen "Qazaqstan barysy" respýblıkalyq týrnıri ótedi.
4 shilde kúni saǵat 18:00-de Amfıteatr sahnasynda "Astana keshi kóńildi" merekelik konsertimen otandyq estrada ártisteri men shyǵarmashylyq ujymdar óner kórsetedi.
4-6 shilde aralyǵynda Ortalyq saıabaqta "Mereke Street" qalalyq mádenıet festıvali ótedi.
5 shilde kúni saǵat 19:00-de fılarmonıanyń konsert zalynda "Ázil álemi" ázil keshi uıymdastyrylady. 5 shilde kúni saǵat 19:00-de "Astana Opera" opera jáne balet teatry kúmis ǵasyrdyń "Shopenıana" jáne "Shehrezada" baletterin usynady.
5 jáne 6 shilde kúnderi "Kolızeı" sport keńistiginde "Otan Ana" monýmentiniń janynda strıtboldan "Nur Sultan Cup" týrnıri uıymdastyrylady. 5-9 shilde aralyǵynda "Astana Balet" teatry "Orfeı jáne Evrıdıka" baletiniń premerasyna shaqyrady.
Astana kúni, ıaǵnı 6 shildede saǵat 11:00-de Trıatlon parkte "Elorda Tolqyny" sporttyq jarysy bastalady. Osy ýaqytta "Qazanat" ıpodromynda shabandozdar arasynda báıgeden "Astana kýbogy" jarysy ótedi. Sol kúni keshke, saǵat 21:00-de Amfıteatr sahnasynda Ulyqpan Joldasov "Aq qanat – aq qusym" baǵdarlamasymen óner kórsetedi. Saǵat 18:00-den 22:00-ge deıin "Astana-Arena" stadıonynyń turaǵynda "Halyqpen birge" dástúrli Open air ótedi. Sol kúni keshke "Qazaqstan" OKZ "Dos-Muqasan" ansambliniń shyǵarmashylyǵyna arnalǵan "Dalam meniń" konserti uıymdastyrylady.
8 shilde kúni saǵat 12: 00-de Amfıteatrda "Men seni súıemin, astanam" atty konserttik qoıylym ótedi. Saǵat 10:00-den 22:00-ge deıin "Barys Arena" mańynda 12 saǵattyq "You Fest" Open air ótedi. Saǵat 17:00-den 22:00-ge deıin memlekettik akademıalyq fılarmonıada respýblıkalyq aqyndar aıtysy ótedi.
