Qazaqstanda onlaın qurbandyq shalýǵa múmkindik beretin qurban2022.kz saıty iske qosyldy. Bıyl elimizde qurban shalý rásimi oflaın jáne onlaın formatta ótedi. Qurban aıt 9 maýsymda bastalady.
"Dinı basqarma el azamattaryna, ásirese qala turǵyndaryna qolaıly jaǵdaı jasaý maqsatynda qurban shalý rásimin qashyqtan ótkizýge arnalǵan qurban2022.kz saıtyn iske qosty", - dep habarlady Qazaqstan musylmandary dinı basqarmasy.
Onlaın qurban shalǵysy keletinder saıt arqyly qurbandyq malyn tańdap, kórsetilgen rekvızıtke qajetti aqshany aýdara alady. Qoı men eshkini bir adam, al iri qara men túıeni bir nemese 7 adam birigip shalsa bolady.
Budan keıin tólem barysynda habarlamaǵa tapsyrys nómiri men qurbandyq shalýshynyń aty-jónin jazý mindetti. Qurbandyq shalynǵan soń onyń foto jáne beıne esebi tapsyrys berýshi kórsetken WhatsApp nómirge jiberiledi.
Qurbandyq eti muqtaj jandarǵa taratylady. Sol sebepti muqtaj jandar osy saıtta etti alýǵa ótinish berýge tıis.
Qurban2022.kz saıtynda Nur-Sultan turǵyndary úshin qurbandyqqa shalynatyn bir qoıdyń baǵasy 70 myń teńge. Al iri qara bir adamǵa 455 myń teńgege shyǵady. Eger jeti adam birigip soısa, árbireýi 65 myń teńgeden tóleýi kerek.
Almaty qalasynda qoı – 75 myń teńge, eshki – 47 myń teńge, iri qara – 392 myń teńge turady.
Saıtta kórsetilgen mal baǵasyna qasapshynyń eńbekaqysy kiredi. Qalǵan qyzmet túrleri (maldy bólshektep soıý, paketterge salyp, muqtajdarǵa jetkizý) – tegin. Qurban aıt úsh kúnge sozylady. Bıyl Qurban aıttyń birinshi kúni senbi, 9 shildege túsip tur.
Qazaqstanda Qurban aıttyń alǵashqy kúni demalys bolyp sanalady. Biraq bul ulttyq nemese memlekettik mereke bolmaǵandyqtan, demalys kúni aýystyrylmaıdy. Sol sebepti qazaqstandyqtarǵa osy jyly qosymsha demalys berilmeıdi.
Pikir qaldyrý